സി.എം.പി ജനറല്‍ സെക്രട്ടറി കെ.ആര്‍.അരവിന്ദാക്ഷന്റെ നിര്യാണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു. സാമൂഹ്യ രാഷ്ട്രീയ മണ്ഡലങ്ങള്‍ക്ക് പൊതുവിലും ഇടതുപക്ഷ രാഷ്ട്രീയത്തിന് പ്രത്യേകിച്ചും നികത്താനാവാത്ത നഷ്ടമാണ് അരവിന്ദാക്ഷന്റെ നിര്യാണം മൂലമുണ്ടായതെന്ന് അദ്ദേഹം അനുശോചന സന്ദേശത്തില്‍ പറഞ്ഞു.

വിദ്യാര്‍ത്ഥി സംഘടനയിലൂടെ രാഷ്ട്രീയത്തിലെ മുഖ്യധാരയിലേക്ക് കടന്നുവന്ന അരവിന്ദാക്ഷന്‍ അക്കാലത്ത് കേരളത്തിലെ പൊതു വിദ്യാര്‍ഥിയുവജന സമൂഹത്തിന്റെയാകെ സ്‌നേഹാദരങ്ങള്‍ നേടിയ പ്രവര്‍ത്തനങ്ങളാണ് കാഴ്ചവച്ചത്. പിന്നീട് കമ്മ്യൂണിസ്റ്റ് പാര്‍ട്ടിയിലേക്ക് വന്ന അരവിന്ദാക്ഷന്‍ നാടിന്റെയും ജനങ്ങളുടെയും താല്‍പര്യം മുന്‍നിര്‍ത്തി പ്രവര്‍ത്തിച്ചു. സഹകരണ പ്രസ്ഥാനത്തെ ശക്തിപ്പെടുത്തുന്നതില്‍ നിര്‍ണായകമായ പങ്കുവഹിച്ചു. സംസ്ഥാന സഹകരണ ബാങ്കിനെ ഒരു പ്രത്യേക ഘട്ടത്തില്‍ അദ്ദേഹം നയിച്ചു.

ഇടതുപക്ഷ രാഷ്ട്രീയത്തെ ശക്തിപ്പെടുത്താനുള്ള ശ്രദ്ധേയമായ നടപടികളുമായി മന്നോട്ടു പോകുന്ന ഘട്ടത്തിലാണ് അരവിന്ദാക്ഷന്റെ നിര്യാണം എന്നത് ഇടതുപക്ഷത്തിന് പൊതുവില്‍ ദു:ഖം ഉണ്ടാക്കുന്നതെന്നും മുഖ്യമന്ത്രി പറഞ്ഞു.