നടിയെ ആക്രമിച്ച കേസിൽ അന്തിമ കുറ്റപത്രം ഒരുങ്ങവെ എല്ലാം അവസാനിച്ചുവെന്ന തോന്നൽ തെറ്റി. ദിലീപിന്‍റെ ഉറ്റ സുഹൃത്തും ബിസിനസ് പങ്കാളിയുമായ റിമി ടോമിയെ ചോദ്യം ചെയ്യുന്നതിന് അന്വേഷണ സംഘം അപേക്ഷ നൽകി. സെക്ഷൻ 164 പ്രകാരം റിമിയെ ചോദ്യം ചെയ്യണമെന്നാവശ്യപ്പെട്ട് കോതമംഗലം മജിസ്ട്രേറ്റ് കോടതിയെയാണ് അന്വേഷണ സംഘം സമീപിച്ചിരിക്കുന്നത്.

രഹസ്യ ചോദ്യം ചെയ്യലാണ് ഉദേശിക്കുന്നതെന്നും അപേക്ഷയിൽ പറയുന്നു. നടിയെ ക്രൂരമായി ഉപദ്രവിക്കുന്നതിനു കൊട്ടേഷൻ കൊടുത്തുവെന്ന് ആരോപിക്കപ്പെടുന്ന ദിലീപുമായി വർഷങ്ങളായി റിമിക്ക് അടുത്ത ബന്ധമാണുള്ളത്. ദിലീപിന്‍റെ നേതൃത്വത്തിൽ സംഘടിപ്പിക്കുന്ന ഷോകളിൽ റിമി പ്രഥാന താരമാണ്. ദിലിപും സംഘവും നടത്തിയ അമേരിക്കൻ സന്ദർശനത്തിന്‍റെ വിവരങ്ങൾ റിമിയിൽ നിന്നും പൊലീസ് ശേഖരിച്ചിരുന്നു. പൾസർ സുനിയുടെ ഭീഷണി ഉണ്ടെന്ന് ദിലീപ് വെളിപ്പെടുത്തിയതിന് ശേഷമാണ് ദിലീപും റിമിയും ഉൾപ്പെട്ട സംഘം അമേരിക്കൻ സന്ദർശനം നടത്തിയത്.

ദിലീപുമായി റിമിക്ക് സാമ്പത്തിക ഇടപാടുകൾ ഉണ്ടെന്നും വാർത്തകൾ വന്നിരുന്നു. ദിലീപുമായുള്ള അടുപ്പത്തിന്‍റെ അടിസ്ഥാനത്തിൽ നടി ആക്രമിക്കപ്പെട്ട വിവരം റിമി എങ്ങനെ അറിഞ്ഞു, ഇതിനു ശേഷം ആരെയൊക്കെ വിളിച്ചു തുടങ്ങിയ കാര്യങ്ങൾ പൊലീസ് റിമി ടോമിയോട് ചോദിച്ചറിഞ്ഞിരുന്നു. അതോടൊപ്പം ദിലീപുമൊത്തുള്ള വിദേശ ഷോകളുടെ വിശദാംശങ്ങളും പൊലീസ് ശേഖരിച്ചു. റിമി നല്‍കിയ ചില ഉത്തരങ്ങളില്‍ പൊരുത്തക്കേടുള്ളതായ് നേരത്തെ സൂചനകളുണ്ടായിരുന്നു.

കുറ്റപത്രം സമർപ്പിക്കാൻ അന്വേഷണസംഘം ഒരുങ്ങുന്ന സമയത്ത് റിമിയുടെ രഹസ്യമൊഴി എടുക്കുന്നത് നിർണായകമാണ്. മുൻപ് അനധികൃത സ്വത്ത് കേസിൽ ഉൾപ്പെടെ ആരോപണ വിധേയയായ താരമാണ് റിമി ടോമി. നടി കേസിൽ റിമിയുടെ പങ്ക് സംബന്ധിച്ച് നിരവധി വാർത്തകൾ പുറത്തു വന്നിരുന്നുവെങ്കിലും പൊലീസ് ഈ വഴിക്ക് നീങ്ങിയില്ല.

എന്നാൽ റിമിക്കെതിരെ തെളിവുകൾ ശേഖരിക്കുന്ന തിരക്കിലായിരുന്നു പൊലീസ് എന്ന സൂചനയും അന്വേഷണ സംഘത്തിൽ നിന്നും ലഭിക്കുന്നുണ്ട്. നടി ആക്രമിക്കപ്പെടുത്തിനു പിന്നാലെ ദിലീപ് റിമിയുമായി ഫോണിൽ സംസാരിച്ചതായും സൂചനകൾ പുറത്തു വരുന്നുണ്ട്. ഇങ്ങനെ വന്നാൽ കുറ്റപത്രം സമർപ്പിക്കുന്നതിനു മുൻപ് റിമിയുടെ അറസ്റ്റും ഉണ്ടായേക്കുമെന്നാണ് സൂചന.