മന്ത്രി തോമസ് ചാണ്ടിക്കെതിരായ കായൽ കൈയേറ്റ ആരോപണം സർക്കാരിന്‍റെ യശസിനെ ബാധിച്ചില്ലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. കളക്ടറുടെ അന്തിമ റിപ്പോർട്ട് ലഭിച്ചാൽ നിയമാനുസൃത നടപടിയെടുക്കും. തെറ്റുചെയ്യുന്നവരെ ഇടതുപക്ഷ സർക്കാർ സംരക്ഷിക്കില്ല. ആരോപണം ഉയർന്നതുകൊണ്ട് ആരെയും ക്രൂശിക്കുകയുമില്ലെന്നും അദ്ദേഹം മാധ്യമങ്ങളോട് പറഞ്ഞു.

കേരളത്തിൽ കലാപമുണ്ടാക്കാനാണ് ബിജെപി ശ്രമിക്കുന്നത്. ബിജെപിയുടെ ജനരക്ഷായാത്രയ്ക്ക് സിപിഎം കേന്ദ്രങ്ങൾ തെരഞ്ഞെടുത്തത് ഇതിന് ഉദാഹരണമാണ്. യാത്രകൊണ്ട് ബിജെപി നേതാക്കളുടെ അജ്ഞത മാറുമെങ്കിൽ നല്ലതാണ്. കീഴാറ്റൂർ സമരത്തിൽ ബിജെപി മുതലെടുപ്പ് നടത്തുകയാണെന്നും കോടിയേരി പറഞ്ഞു.സോളാർ കേസിൽ ജുഡീഷൽ കമ്മീഷൻ റിപ്പോർട്ട് സമർപ്പിച്ച വിഷയത്തിൽ ഇപ്പോൾ പ്രതികരിക്കാനില്ലെന്നും കോടിയേരി പറഞ്ഞു.