നവരാത്രികാലത്തെ പൂജകളില്‍ ഏറ്റവും സുപ്രധാനമായ ദുര്‍ഗ്ഗാഷ്ടമി ഇന്ന്. എല്ലാം ദുര്‍ഗ്ഗയ്ക്ക് വേണ്ടി സമര്‍പ്പിക്കുക എന്നതാണ് ഇതിനര്‍ത്ഥം.ദുര്‍ഗാം ധ്യായതു ദുര്‍ഗതി പ്രശമന്യാം ദുര്‍വാദള ശ്യാമളാം എന്ന മന്ത്രത്താല്‍ മുഖരിതമായ അന്തരീക്ഷത്തില്‍ കേരളത്തിലെ വിവിധ ദേവീക്ഷേത്രങ്ങളില്‍ ഇന്നലെ ദീപാരാധനയും ദുര്‍ഗാഷ്ടമിപൂജയും കഴിഞ്ഞ് പൂജവയ്പ് മഹോത്സവം തുടങ്ങി.

ക്ഷേത്രങ്ങളിലും മഠങ്ങളിലും വീടുകളിലും സരസ്വതിയെ ധ്യാനിച്ച് പുസ്തകങ്ങളും എഴുത്തുപകരണങ്ങളും പൂജവച്ചു. പീഠത്തില്‍ വെള്ളവസ്ത്രം വിരിച്ച് സരസ്വതീ ദേവിയുടെയോ ശാരദാദേവിയുടെയോ ചിത്രമോ വിഗ്രഹമോ സ്ഥാപിച്ച് നിലവിളക്കില്‍ അഞ്ച് തിരിയിട്ട് തെളിച്ചാണ് പൂജവയ്പുചടങ്ങ് നടത്തിയത്. നാളെ പൂജയെടുക്കുന്നതുവരെ വിളക്ക് അണയാതെ കാക്കണം.
ഇന്നാണ് മഹാനവമി. നവരാത്രി ആഘോഷങ്ങളില്‍ പ്രധാനദിവസം. ആദ്യത്തെ മൂന്നുദിവസങ്ങള്‍ ദുര്‍ഗയെയും രണ്ടാമത്തെ മൂന്നുദിവസം മഹാലക്ഷ്മിയെയും പ്രീതിപ്പെടുത്തിയിട്ട് സരസ്വതീപൂജ നടത്തി നവരാത്രിക്ക് പൂര്‍ണതനല്‍കുന്ന ദിവസമാണ് മഹാനവമി.

അന്ധകാരത്തിന്റെ ശക്തികളോട് ദേവി പൊരുതുന്ന രാത്രിയാണിത്. നാളെ വിജയദശമി നന്മയുടെയും ധര്‍മ്മത്തിന്റെയും വിജയദിനമാണ്. വിദ്യാഭ്യാസം തുടങ്ങാനും ആയുധ, സുകുമാര കലാപഠനം തുടങ്ങാനും യോജിച്ചദിവസമാണ്. വിജയദശമിദിനത്തില്‍ വെളുപ്പിന് നാലുമുതല്‍ ഗണപതിക്കും സരസ്വതിക്കും ഗുരുവിനും പൂജകള്‍ ചെയ്താണ് അക്ഷരമെഴുത്തു തുടങ്ങുന്നത്. കേരളത്തിനുപുറത്ത് കൊല്ലൂര്‍ മൂകാംബിക ക്ഷേത്രത്തിലാണ് വിദ്യാരംഭം പ്രാധാന്യത്തോടെ നടത്തുന്നത്.