കണ്ണൂർ കീഴാറ്റൂരിൽ വയൽ നികത്തിയുള്ള ബെെപ്പാസ് നിർമാണത്തിനെതിരെയുള്ള സമരം അവസാനിപ്പിച്ചു. 20 ദിവസം നീണ്ട നിരാഹാര സമരമാണ് ഇന്ന് അവസാനിപ്പിച്ചത്.

ദേശീയപാത വികസനത്തിന്റെ ഭാഗമായി കീഴാറ്റൂർ വയലിലൂടെ ബൈപാസ് നിർമ്മിക്കുന്നതിനുള്ള വിജ്ഞാപനം നീട്ടാൻ ധാരണയായതോടെയാണ് സമരം അവസാനിപ്പിക്കാൻ തീരുമാനിച്ചത്. എന്നാൽ നെൽവയൽ നികത്തി വീണ്ടും ബെെപ്പാസ് നിർമിക്കാൻ ശ്രമിച്ചാൽ സമരം വീണ്ടും തുടങ്ങുമെന്ന് സമരസമിതി അറിയിച്ചു.

പൊതുമരാമത്ത് മന്ത്രി ജി. സുധാകരനുമായി സമരസമിതി പ്രവർത്തകർ നടത്തിയ ചർച്ചയിലാണ് ബൈപ്പാസ് നിർമ്മാണത്തിൽ സമവായം ഉണ്ടാകുന്നത് വരെ വിജ്ഞാപനം നീട്ടാൻ ധാരണയായത്.

നേരത്തെ, ബി.ജെ.പി നേതാക്കളടക്കം എത്തി സമരത്തിന് പിന്തുണ അറിയിച്ചിരുന്നു. ഇതിന് പിന്നാലെ വിഷയം കൂടുതൽ ചർച്ചയാവുന്നതിന് മുമ്പ് സമരം അവസാനിപ്പിച്ചത് സി.പി.എമ്മിന് ആശ്വാസമാണ്.