നടിയെ ആക്രമിച്ച കേസിൽ ജയിലിലായ ദിലീപ് ഇപ്പോൾ അഴികൾക്കുള്ളിലെ ജീവിതത്തോട് ഏറെ പൊരുത്തപ്പെട്ടു കഴിഞ്ഞിരിക്കുന്നു. 400 കോടിയുടെ ആർഭാടങ്ങൾ ഉപേക്ഷിക്കേണ്ടി വന്ന് ആലുവ ജയിലിലെ കൊതുകുകടി കൊള്ളുന്ന ഇരുട്ടു മുറിയിൽ കഴിച്ചു കൂട്ടേണ്ടി വന്നിട്ടും സ്വന്തം സിനിമയുടെ വിജയത്തിൽ ദിലീപ് സന്തോഷവാനാണ്. ദിലീപിന് ആദ്യമായാണ് സ്വന്തം ചിത്രത്തിന്‍റെ വിജയം ജയിലിൽ ആഘോഷിക്കേണ്ടിവന്നത്.

ഇന്നലെ സിനിമ റിലീസ് ചെയ്യുന്ന ദിവസം താരം മുമ്പെങ്ങുമില്ലാത്ത വിധം അക്ഷമനായിരുന്നുവെന്നാണ് ജയിലിലെ റിപ്പോർട്ട്. അറസ്റ്റിലായി ജയിലിലെത്തിയ ശേഷം ആദ്യ ദിവസങ്ങളിൽ കണ്ട അതേ അസ്വസ്ഥതയായിരുന്നു ദിലീപിന്. ആദ്യ ഷോയുടെ പ്രതികരണം 12 മണിയോടെ തന്നെ ജയിലിൽ എത്തി തുടങ്ങി. ഉദ്യോഗസ്ഥർ തന്നെയാണ് താരത്തോട് സിനിമ സൂപ്പർ ഹിറ്റായെന്ന് അറിയിച്ചത്. എറണാകുളത്തെ തീയേറ്ററുകളിലെ തിക്കും തിരക്കും ആരാധകരുടെ ആരവങ്ങളും വൈകിട്ട് ഡ്യൂട്ടിക്കെത്തിയ ഉദ്യോഗസ്ഥർ വിശദീകരിച്ചു. എല്ലാം കേട്ട ശേഷം ജയിൽ മുറിയിലേക്ക് മടങ്ങി പോയ ദിലീപ് അൽപ നേരം ബൈബിൾ വായിക്കാനാണ് സമയം ചിലവഴിച്ചത്.

ജയിലിലായി ആദ്യ ദിവസങ്ങളിൽ ദിലീപ് സങ്കീർത്തനം വായിക്കുന്നത് വാർത്തയായിരുന്നു. സമാനമായി ഇന്നലെയും ദിലീപ് ഏറെ നേരം ബൈബിൾ വായിച്ചു. ജയിൽ മുറിക്കുള്ളിലും ഇന്നലെ താരം സന്തോഷവാനായിരുന്നുവത്രേ. സഹതടവുകാരോട് അൽപം തമാശകൾ പൊട്ടിക്കാനും ജനപ്രിയ താരം മറന്നില്ല. ഇന്നു രാവിലെ പതിവിലും ഉൻമേഷവാനായിട്ടാണ് താരത്തെ ജയിലിൽ കാണപ്പെട്ടത്. കുറ്റപത്രം സമർപ്പിക്കാൻ ദിവസങ്ങൾ മാത്രം ശേഷിക്കെ ജാമ്യം ലഭിക്കുമോ എന്ന ആശങ്ക താരത്തിനെ അലട്ടുന്നുണ്ട്. ദിലീപിന്റെ റിമാന്‍ഡ്‌ കാലാവധി ഒക്‌ടോബര്‍ 12 വരെ നീട്ടി.