ഇന്ന് വിജയദശമി. വിജയദശമി ദിനത്തില്‍ സംസ്ഥാനത്തൊട്ടാകെ ആയിരക്കണക്കിന് കുരുന്നുകള്‍ ഹരിശ്രീ കുറിക്കാനായി എത്തിക്കഴിഞ്ഞു.ദക്ഷിണ മൂകാംബി എന്നറിയപ്പെടുന്ന കോട്ടയം പനച്ചിക്കാട്, ഭാഷാ പിതാവിന്റെ നാടായ തിരൂര്‍ തുഞ്ചന്‍പറമ്പ്, തലസ്ഥാനത്തെ ഐരാണിമുട്ടം തുഞ്ചന്‍ സ്മാരകം, പൂജപ്പുര സരസ്വതീമണ്ഡപം എന്നിവിടങ്ങളിലും, മറ്റ് ദേവി ക്ഷേത്രങ്ങളിലും എഴുത്തിനിരുത്ത് ചടങ്ങുകള്‍ നടക്കും.

വിവിധയിടങ്ങളിലായി നടക്കുന്ന എഴുത്തിനിരുത്ത് ചടങ്ങുകള്‍ക്ക് സാഹിത്യസാംസ്‌കാരിക രംഗത്തെ പ്രമുഖര്‍ നേതൃത്വം നല്‍കും. ക്‌ഷേത്രങ്ങള്‍ക്ക് പുറമെ ചില െ്രെകസ്തവ ദേവാലയങ്ങളിലും എഴുത്തിനിരുത്തല്‍ ചടങ്ങ് നടത്തുന്നുണ്ട്. തിരൂര്‍ തുഞ്ചന്‍ പറമ്പില്‍ എഴുത്തിനിരുത്ത് തുടങ്ങി. കൊച്ചിയില്‍ ചോറ്റാനിക്കര ദേവീ ക്ഷേത്രത്തിലും പറവൂര്‍ ദക്ഷിണ മൂകാംബിക ക്ഷേത്രത്തിലും എഴുത്തിനിരുത്തല്‍ ചടങ്ങ് നടക്കുകയാണ്.

തിരുവനന്തപുരം പൂജപ്പുര സരസ്വതീ മണ്ഡപം ദേവീക്ഷേത്രം, ആറ്റുകാല്‍ ക്ഷേത്രം, തോന്നക്കല്‍ ആശാന്‍ സ്മാരകം എന്നിവിടങ്ങളില്‍ രാവിലെ മുതല്‍ തന്നെ ചടങ്ങുകള്‍ തുടങ്ങി.പലയിടത്തും കുരുന്നുകളുടെ എണ്ണം കൂടുതലായതിനാല്‍ ഉച്ചവരെ ചടങ്ങുകള്‍ നീളുമെന്നാണ് വിവരം. പുലര്‍ച്ചെ നാലുമണിക്ക് പലയിടത്തും ചടങ്ങുകള്‍ ആരംഭിച്ചു. തിരൂര്‍ തുഞ്ചന്‍ പറമ്പിലെ എല്ലാ വിദ്യാരംഭ കേന്ദ്രങ്ങളിലും കനത്ത തിരക്കാണ്.