പത്മനാഭസ്വാമി ക്ഷേത്രദര്‍ശനം ഉടന്‍ നടത്തില്ലെന്ന് യേശുദാസ് പറഞ്ഞു. ഇത് എന്റെ തീരുമാനമാണ്. ഇത് ആരുടേയും നിര്‍ബന്ധത്തിന് വഴങ്ങിയോ, പ്രേരണയിലോ ഉള്ള നിലപാടല്ലെന്നും ദൈവഭയം കൊണ്ടാണെന്നും അദ്ദേഹം പറഞ്ഞു.

ക്ഷേത്രകമ്മിറ്റിയും തന്ത്രിയും അനുമതി നല്‍കിയിട്ടും ശ്രീപത്മനാഭ സ്വാമി ക്ഷേത്രത്തില്‍ സന്ദര്‍ശനം നടത്താതെയാണ് യേശുദാസ് മടങ്ങിയത്. ഞായറാഴച്ച തിരുവനന്തപുരത്ത് സൂര്യ ഫെസ്റ്റിവലിന് തുടക്കം കുറിച്ച് നടത്തിയ സംഗീത കച്ചേരിക്കിടയിലാണ് അദ്ദേഹം തന്റെ നിലപാട് വ്യക്തമാക്കിയത്.

ഗുരുവായൂരപ്പനെ ഇതുവരെ തൊഴാന്‍ കഴിഞ്ഞിട്ടില്ല. അന്ന് ഏറെ ആഗ്രഹം തോന്നിയിട്ടും നടക്കാതിരുന്നപ്പോള്‍ വിഷമമുണ്ടായിരുന്നു. ഒന്നു തൊഴാന്‍ കഴിഞ്ഞില്ലല്ലോ എന്ന്. ഗുരുവായൂരപ്പനെ ദര്‍ശിക്കാതെ കൃഷ്ണന്റെ മറ്റ് ക്ഷേത്രങ്ങളില്‍ പോകേണ്ടെന്ന് പിന്നീട് ഒരു ശാഠ്യമുണ്ടായി.
എന്നിട്ടും അതിനിടയില്‍ സുഹൃത്തുക്കളുടെ പ്രേരണയില്‍ ഒരുതവണ ഉഡുപ്പിയില്‍ കൃഷ്ണ ക്ഷേത്രത്തില്‍ ദര്‍ശനത്തിന് പോകേണ്ടിവന്നു. അത് നടത്താന്‍ വിഷമമുണ്ടായിരുന്നു.എന്നാല്‍ സുഹൃത്തിനെ മുഷിപ്പിക്കാനും മനസ് വന്നില്ല.
മൂകാംബികയില്‍ പോയി മടങ്ങുമ്പോഴായിരുന്നു അത്. എന്നാല്‍ അന്ന് ഒരു അത്ഭുതമുണ്ടായി അവിടെ. കൃഷ്ണഭഗവാന്‍ ഉഡുപ്പിയില്‍ ദര്‍ശനം നല്‍കിയത് ശ്രീരാമന്റെ രൂപത്തില്‍ അലങ്കാരഭാവത്തോടെയാണ്. അത് ഒരു നിമിത്തമായി കാണുന്നതായും അദ്ദേഹം പറഞ്ഞു.