നടിയെ ആക്രമിച്ച കേസില്‍ ദിലീപ് അറസ്റ്റിലായതോടെ മരണ വീടുപോലെയായിരുന്ന പത്മസരോവരം ഇപ്പോൾ ആഹ്ലാദത്തിലാണ്. വിധിയറിഞ്ഞ കാവ്യയും മീനാക്ഷിയും കെട്ടിപ്പിടിച്ച് ആനന്ദകണ്ണീര്‍ പൊഴിച്ചു. കാവ്യയും മീനാക്ഷിയും ഏറെ നാളുകൾക്ക് ശേഷമാണ് ഇന്ന് വീണ്ടും പുഞ്ചിരിച്ചതെന്നാണ് കുടുംബത്തിലെ മുതിർന്ന അംഗം പറഞ്ഞത്. ദിലീപിന്റെ ദോഷകാലം തീർന്നുവെന്ന വിലയിരുത്തലാണ് കുടുംബത്തിനുള്ളത്. ഭഗവത്പ്രീതിക്ക് വേണ്ടി ലക്ഷങ്ങളാണ് ചെലവിട്ടത്. കാവ്യയും മകൾ മീനാക്ഷിയും ദിലീപിന്റെ അമ്മയും നടൻ എത്തുന്നതും കാത്തിരിപ്പാണ്.

ജയിലിൽ നിന്ന് നടൻ നേരെ വീട്ടിൽ തന്നെ എത്തുമെന്നാണ് സൂചന. ജയിലിൽ നിന്ന് ഒന്നരകിലോമീറ്റർ അകലെയാണ് ദിലീപിന്റെ വീടുള്ളത്. രാമലീലയുടെ പ്രദർശനം ദിലീപ് കുടുംബത്തോടെ കാണാനെത്തുമെന്ന് ആരാധകരും പ്രതീക്ഷിക്കുന്നു. നടപടി ക്രമങ്ങൾ പൂർത്തിയാക്കാൻ ദിലീപിന്റെ അഭിഭാഷകർ അതിവേഗം നീങ്ങുകയാണ്.

ജാമ്യം അനുവദിച്ചത് ഉച്ചയ്ക്ക് രണ്ട് മണിക്ക് മുന്‍പായതിനാല്‍ ഈ നടപടികളെല്ലാം ഇന്ന് തന്നെ പൂര്‍ത്തിയാക്കാന്‍ കഴിയുമെന്നാണ് ദിലീപിന്റെ അഭിഭാഷകരുടെ പ്രതീക്ഷ. ജയിലില്‍ അര മണിക്കൂറില്‍ താഴെ മാത്രം നീളുന്ന നടപടികള്‍ മാത്രമേയുണ്ടാകൂ. പുറത്തിറങ്ങുന്ന നടനെ സ്വീകരിക്കാന്‍ ആരാധകരും സിനിമാ രംഗത്തുള്ളവരും വലിയ ഒരുക്കങ്ങളാണ് നടത്തുന്നത്. വിധി വന്ന ഉടന്‍ തന്നെ ദിലീപിന്റെ ആരാധകര്‍ ജയിലിന് മുന്നില്‍ തടിച്ചുകൂടി.

പുതിയ ചിത്രമായ രാമലീലയുടെ റിലീസിന് പിന്നാലെ നടന്‍ പുറത്തിറങ്ങുന്നത് വലിയ ആഘോഷമാക്കാനാണ് ഫാന്‍സ് അസോസിയേഷന്റെ തീരുമാനം. ജാമ്യ വിവരം അറിഞ്ഞതിന് പിന്നാലെ കൊച്ചിയിലും തൃശൂരിലും ആരാധകർ ലഡു വിതരണം നടത്തി. പുറത്തിറങ്ങുന്ന ദിലീപിനെയും കൊണ്ട് നഗരത്തില്‍ റോഡ് ഷോ നടത്താനും ആരാധകര്‍ തീരുമാനിച്ചിട്ടുണ്ട്.