മൂന്നര വയസ്സുകാരിയെ ക്രൂരമായി മർദിക്കുകയും ​ശരീരമാസകലം പൊള്ളലേൽപിക്കുകയും ചെയ്​ത കൊല്ലം ഇരവിപുരം വാളത്തുംഗൽ തൊടിയിൽ വീട്ടിൽ ആഷിക്കിനെ കുണ്ടറ പോലീസ് അറസ്റ്റ് ചെയ്തു. ഈ യുവാവിനൊപ്പം വാടകവീട്ടിൽ താമസിച്ചിരുന്ന പെൺകുട്ടിയെയാണ് ശാരീരികമായി പീഡിപ്പിച്ചത്. പറഞ്ഞത് അനുസരിക്കാത്തതിനാലാണ് കുട്ടിയെ ക്രൂരമായി മർദിക്കുകയും പൊള്ളലേൽപ്പിക്കുകയും ചെയ്തത്.

കുഞ്ഞിന്റെ കരച്ചിലിന്റെ ശബ്ദം കേട്ട് കുടുംബശ്രീ പ്രവർത്തകർ അറിയിച്ചതിനെ തുടർന്ന് വാർഡ് മെമ്പർ എത്തുകയും പോലീസിൽ അറിയിക്കുകയും ചെയ്തിരുന്നു. കുട്ടി വളരെയധികം അവശയായിരുന്നു. ആഷിഖിനെയും ഭാര്യയെയും കസ്റ്റഡിയിൽ എടുത്തെങ്കിലും ആഷിക്കിനെ മാത്രമാണ് അറസ്റ്റ് ചെയ്ത കോടതിയിൽ ഹാജരാക്കിയത്.

കുട്ടിയെ കുണ്ടറ താലൂക്ക് ആശുപത്രിയിൽ വൈദ്യ പരിശോധനക്ക്​ വിധേയമാക്കി. ദേഹത്ത് അടിച്ചതിന്റെയും പൊള്ളിച്ചതിന്റെയും പാടുകളുണ്ട്. കുട്ടിയെയും മാതാവിനെയും മഹിളാമന്ദിരത്തിലാക്കി. വിദഗ്​ധ പരിശോധനക്ക്​ വിധേയയാക്കും. പ്രതിയെ ബുധനാഴ്ച കോടതിയിൽ ഹാജരാക്കും. സംഭവത്തിൽ സംസ്ഥാനബാലാവകാശസംരക്ഷണ കമ്മീഷൻ സ്വമേധയാ കേസെടുത്തു. മാധ്യമ വാർത്തകളുടെ അടിസ്ഥാനത്തിലാണ് നടപടി.