ന്റമ്മച്ചീ... ഈ ജയിലെന്ന് പറഞ്ഞാൽ നമ്മൾ സിനിമക്ക് സെറ്റിടുന്നതുപോലല്ലാട്ടാ... അതൊരു സംഭവമാണ്. ഒരു പൗരനായാൽ ജീവിതത്തിൽ ഒരിക്കലെങ്കിലും ജയിലിൽ കിടക്കണം… പറയുമ്പോളും ദിലീപിന്‍റെ കണ്ണുകളിൽ നിന്നും അമ്പരപ്പ് മാറിയിരുന്നില്ല. 85 ദിവസത്തെ ജയിൽ വാസത്തിനു ശേഷം തിരിച്ചെത്തിയ ദിലീപ് ജയിലിലെ അനുഭവങ്ങൾ ബന്ധുക്കളോടും സുഹൃത്തുക്കളോടും പങ്കു വക്കുന്ന തിരക്കിലായിരുന്നു. ദിലീപിനെ വിഷമിപ്പിക്കേണ്ടെന്നു വച്ച് ആരും ഒന്നും ചോദിക്കാൻ കൂട്ടാക്കിയില്ല. എന്നാൽ ചോദിക്കാതെ തന്നെ വിശേഷങ്ങൾ ദിലീപ് പറഞ്ഞു തുടങ്ങി. അതും പതിവ് നർമത്തിൽ. എല്ലാത്തിനെയും നർമത്തിൽ കാണുന്നതാണ് ദിലീപിനു പ്രിയം.

ജയിൽ ജീവിതവും നർമത്തിൽ തന്നെയാണ് ദിലീപ് അവതരിപ്പിച്ചത്. ജയിലിലെ കൊതുകു കടിയും സഹതടവുകാരുടെ പെരുമാറ്റവും പൊലീസുകാരുടെ ഭാവങ്ങളുമെല്ലാം തൻമയത്തത്തോടെ താരം അഭിനയിച്ചും കാണിച്ചു. സ്വയ സിദ്ധമായ ശൈലിയിൽ എല്ലാം പറയുമ്പോൾ കേട്ടു നിന്നവർക്ക് വിഷമത്തെക്കാൾ ചിരിയാണ് വന്നതെന്നതും മറ്റൊരു പ്രത്യേകത. ഇന്നലെ രാത്രി വൈകിയാണ് ദിലീപും കുടുംബവും ഒന്നു ഫ്രീ ആയത്. ജയിലിൽ നിന്നും നേരെ എത്തിയ കുടുംബ വീട്ടിൽ നിന്നും രാത്രി വൈകി ആലുവയിലെ തന്നെ സ്വന്തം വീട്ടിലേക്ക് ദിലീപ് മടങ്ങി. ഭാര്യ കാവ്യയും മകൾ മീനാക്ഷിയും അമ്മയും ഒപ്പമുണ്ടായിരുന്നു.

ഇന്നലെ ഉച്ചയോടെയാണ് ഹൈക്കോടതി ദിലീപിന് ജാമ്യം അനുവദിച്ചത്. ജയിലിന് പുറത്ത് സഹപ്രവര്‍ത്തകരും ഫാന്‍സ് അസോസിയേഷന്‍ പ്രവര്‍ത്തകരും വന്‍ വരവേല്‍പ്പാണ് ദിലീപിന് വേണ്ടി തയ്യാറാക്കിയത്. ആലുവ ഡിവൈഎസ്പിയുടെ നേതൃത്വത്തില്‍ വന്‍ സുരക്ഷാ സംവിധാനങ്ങളും ജലിയിന് പുറത്ത് ഒരുക്കിയിരുന്നു. ആരാധകര്‍ ലഡു വിതരണം ചെയ്തും ദിലീപിന്റെ വലിയ കട്ടൗട്ടില്‍ മാലയിട്ടും സന്തോഷം പങ്കിട്ടു. നടനും സംവിധായകനുമായ കലാഭവന്‍ അന്‍സാര്‍, ധര്‍മജന്‍ ബോള്‍ഗാട്ടി തുടങ്ങിയ പ്രമുഖരും ജയിലിന് മുന്നിലെത്തിയിരുന്നു. ദിലീപിനെ മോചിപ്പിക്കാനുള്ള അങ്കമാലി മജിസ്‌ട്രേറ്റിന്റെ ഉത്തരവുമായി സഹോദരന്‍ അനൂപാണ് ആലുവ സബ്ജയിലിലെത്തിയത്.

ദിലീപ് ജയിലില്‍നിന്ന് പുറത്തുവരുന്ന ദൃശ്യങ്ങള്‍ ടി.വി.യില്‍ വന്നതോടെ വീടിനുള്ളില്‍ ആരവവും കൈയടികളും ഉയര്‍ന്നു. ദിലീപ് പോലും പ്രതീക്ഷിക്കാത്ത തരത്തിൽ ജാമ്യം കിട്ടിയ രാമലീലാ നായകന് വീരോചിതമായ വരവേൽപ്പ് ഫാൻസുകാർ നൽകി. ദിലീപിന് ജാമ്യം കിട്ടതിന്റെ ആവേശവും സന്തോഷവും ബന്ധുക്കളിലും സുഹൃത്തുക്കളിലും പ്രകടമായിരുന്നു.

പടിപ്പുരവാതില്‍ തുറന്ന് അകത്തുകടന്ന ദിലീപിനെ അമ്മ സരോജം കെട്ടിപ്പുണര്‍ന്ന് ഉമ്മവെച്ചു. പുറത്തേക്കിറങ്ങിവന്ന ഭാര്യ കാവ്യാമാധവനെയും മകള്‍ മീനാക്ഷിയെയും ചേര്‍ത്തുപിടിച്ച് നടന്‍ അകത്തേക്കുകടന്നു. നടന്‍ സിദ്ദിഖും നേരത്തേ ഇവിടെയെത്തിയിരുന്നു. സിദ്ദിഖും പുറത്തേക്കുവന്ന് ദിലീപിനെ കെട്ടിപ്പിടിച്ചു. ബന്ധുക്കളും അടുത്ത സുഹൃത്തുക്കളുമായി കുറേപ്പേര്‍ വീടിനുള്ളിലുണ്ടായിരുന്നു.

അപ്പോഴേക്കും അടുത്തസുഹൃത്തും സംവിധായകനുമായ നാദിര്‍ഷയെത്തി. ദിലീപിന്റെ പുതിയ സിനിമയുടെ സംവിധായകന്‍ അരുണ്‍ ഗോപി, നടി ലക്ഷ്മിപ്രിയ, നടന്‍ ധര്‍മജന്‍ ബോള്‍ഗാട്ടി, നിര്‍മാതാവ് ടോമിച്ചന്‍ മുളകുപാടം, കലാഭവന്‍ ഷാജോണ്‍, ഹരിശ്രീ അശോകന്‍ എന്നിവരും ദിലീപിനെ കാണാനെത്തി.