വീണ്ടും തെരുവുനായ ആക്രമണം രൂക്ഷമാകുന്നു. കോഴിക്കോട് വടകരയില്‍ തെരുവുനായയുടെ കടിയേറ്റ് മൂന്നു വയസുകാരന്‍ ഉള്‍പ്പടെ 40ലധികം പേര്‍ക്ക് പരിക്കേറ്റതായി റിപ്പോര്‍ട്ട്. ഇന്ന് രാവിലെയാണ് തെരുവുനായ നിരവധി പേരെ കടിച്ചത്. വടകര റെയില്‍വേ സ്‌റ്റേഷന് സമീപത്ത് നിന്നുമാണ് ആദ്യമായി നായയുടെ കടിയേല്‍ക്കുന്നത്.വടകര താഴെയങ്ങാടിയിലാണ് നായ നാട്ടുകാരെ ആക്രമിച്ചത്. 12 കിലോമീറ്ററോളം ഓടിയ നായ നിരവധി പേരെ കടിക്കുകയായിരുന്നെന്നാണ് വിവരം. പേപ്പട്ടിയാണെന്ന് സംശയമുണ്ട്.

മടപ്പള്ളി സര്‍ക്കാര്‍ കോളേജിലെ ഒരു വിദ്യാര്‍ഥിക്കും കടിയേറ്റിട്ടുണ്ട്. കോഴിക്കോട് മെഡിക്കല്‍ കോളേജില്‍ 35 ഓളം പേരെയാണ് ചികിത്സക്കായി പ്രവേശിപ്പിച്ചിരിക്കുന്നത്. വടകര ജില്ലാ ആശുപത്രിയിലും നിരവധി പേരെ പ്രവേശിപ്പിച്ചു. അഞ്ചോളം കുട്ടികള്‍ക്കാണ് കടിയേറ്റിരിക്കുന്നത്. ഇപ്പോഴും ആളുകള്‍ മെഡിക്കല്‍ കോളേജില്‍ ചികിത്സക്കായി എത്തുന്നുണ്ട്.