ജനരക്ഷായാത്രയുടെ നാലാം ദിനം പാനൂരില്‍നിന്ന് കൂത്തുപറമ്പിലേക്ക്. കേന്ദ്ര ജലവകുപ്പ് സഹമന്ത്രി അര്‍ജുന്‍ റാം മെഘ്‌വാളാണ് നാലാം ദിനത്തില്‍ പദയാത്രയില്‍ അണിനിരക്കുന്ന കേന്ദ്രനേതാവ്. 10 കി.മീ ദൂരമാണ് നാലാം ദിനത്തെ പദയാത്ര. ഇതോടെ കണ്ണൂര്‍ ജില്ലയിലെ പര്യടനം പൂര്‍ത്തിയാക്കി കോഴിക്കോട് ജില്ലയിലേക്ക് നീങ്ങും.

പദയാത്രക്ക് പാനൂര്‍, കൂത്തുപറമ്പ് മേഖലകളില്‍ കനത്തസുരക്ഷയാണ് ഏര്‍പ്പെടുത്തിയിട്ടുള്ളത്. നാലാം ദിനം യാത്ര കടന്നുപോകുന്ന മേഖല സി.പി.എമ്മിനും ബി.ജെ.പിക്കും സ്വാധീനമുള്ള കേന്ദ്രങ്ങള്‍ ഉള്‍പ്പെട്ട പ്രദേശമാണ്. പിണറായിവഴിയുള്ള യാത്ര ഉള്‍പ്പെടെ പ്രശ്‌നങ്ങളില്ലാതെ പൂര്‍ത്തിയാക്കാന്‍ കഴിഞ്ഞത് പൊലീസിന് ആശ്വാസംപകരുന്നു. എന്നാല്‍, ജില്ലയിലെ സമാപനപരിപാടിയില്‍ ഇരുപക്ഷവും സംയമനം കൈവിടുമോയെന്ന ആശങ്ക പൊലീസിനുണ്ട്.