മദ്യപിച്ച് പോലീസിനെ വെട്ടിച്ച് ചീറിപ്പാഞ്ഞു. പോലീസിന് പിടികൂടാനാകാത്തവിധം 14 കിലോമീറ്ററോളം അമിതവേഗത്തിൽ അടൂര്‍ സ്വദേശിയായ യുവാവും യുവതിയും കാറിൽപ്പോയി. ഒടുവിൽ ഇവർ കോട്ടയത്ത് ട്രാഫിക് ബ്ലോക്കിൽ അകപ്പെടുകയും പോലീസ് പിടിയിലാവുകയും ചെയ്തു. കുമരകത്ത് നിന്നും മദ്യലഹരിയില്‍ കാറുമായി പാഞ്ഞ ഇവർ റോഡില്‍ പരിഭ്രാന്തിയുണ്ടാക്കുക ചെയ്തു. വാഹനം ഓടിച്ച യുവാവിനെതിരേ കേസെടുത്ത പോലീസ് യുവതിയെ ബന്ധുക്കളെ വിളിച്ചു വരുത്തി പറഞ്ഞയച്ചു. കുമരകത്ത് നിന്നും കോട്ടയത്തേക്കാണ് ഇവര്‍ കാര്‍ പറപ്പിച്ചത്. അമിത വേഗത്തില്‍ പോയ ഇരുവരെയും ഏഴു സ്ഥലത്ത്‌വച്ച് പോലീസ് പിടികൂടാന്‍ ശ്രമിച്ചെങ്കിലും നടന്നില്ല. ഏറ്റവും അവസാനം ചാലുകുന്നിലെ ബ്ലോക്കിൽ പെട്ടതോടെയാണ് ഇരുവരെയും പോലീസ് പൊക്കിയത്.

രാവിലെ കുമരകത്ത് എത്തിയ ഇരുവരും ഹോട്ടലില്‍ താമസിച്ച ശേഷം വൈകിട്ട് നാലിനു വീട്ടിലേക്ക് മടങ്ങുമ്പോഴായിരുന്നു സംഭവം. മദ്യപിക്കാനാണ് ഇവര്‍ ഇവിടെ എത്തിയതെന്നും വഴിയരികില്‍ കാറില്‍ ഇരുന്ന മദ്യപിക്കുന്നത് കണ്ടതായും വിവരമുണ്ട്. കാറിലിരുന്ന് മദ്യപിക്കുന്നത് കണ്ട് നാട്ടുകാര്‍ അടുത്തു കൂടുകയുണ്ടായി. കുമരകത്തിനും കോട്ടയത്തിനും ഇടയില്‍ ഇല്ലിക്കലില്‍ വെച്ച് പോലീസ് കൈ കാണിച്ചെങ്കിലും നിര്‍ത്താതെ പോകുകയായിരുന്നു. തുടര്‍ന്ന് വിവരം നഗരത്തിലെ ട്രാഫിക് പോലീസിനും വെസ്റ്റ് പോലീസിനും കൈമാറി. ഒടുവില്‍ ചാലുകുന്നില്‍ വാഹനം ഗതാഗതക്കുരുക്കില്‍ പെട്ടപ്പോള്‍ പിന്നാലെയെത്തിയ പോലീസ് പിടികൂടുകയായിരുന്നു. മദ്യപിച്ച് കാറോടിച്ചതിനാണ് യുവാവിനെതിരേ കേസെടുത്തിട്ടുള്ളത്.