ഞെട്ടിപ്പിക്കുന്ന ഒരു വാര്‍ത്തയാണ് സിനിമാ ലോകത്ത് നിന്നും കേള്‍ക്കുന്നത്. സിനിമാ അഭിനേതാക്കളുടെ ഏക മലയാള സംഘനയായ അസോസിയേഷന്‍ ഓഫ് മലയാളം മൂവി ആര്‍ട്ടിസ്റ്റ് അഥവാ അമ്മയിലേക്ക് പിസി ജോര്‍ജ് എംഎല്‍എയെ ദിലീപിന്റെ അനുകൂലികള്‍ കൊണ്ടുവരാന്‍ ശ്രമിക്കുന്നുവെന്ന് റിപ്പോര്‍ട്ട്. രണ്ട് മൂന്ന് സിനിമകളില്‍ ചെറിയ വേഷം ചെയ്ത പിസി ജോര്‍ജിനെ എന്ത് കൊണ്ട് അമ്മയിലെടുത്തുകൂടാ എന്നാണ് ദിലീപ് അനുകൂലികള്‍ ചോദിക്കുന്നത്. 

ദിലീപേട്ടന്‍ അകത്ത് കിടന്ന സമയത്ത് കൊള്ളാവുന്ന ഒരെണ്ണം പോലും വായ് തുറക്കാതിരുന്ന സമയത്താണ് പിസി ജോര്‍ജ് ദിലീപിനായി അങ്കം മുറുക്കിയത്. വനിതാ കമ്മീഷനെപ്പോലും വെള്ളം കുടിപ്പിച്ചതല്ലാതെ പിസി തോറ്റില്ല. ഇപ്പോഴും അദ്ദേഹം പറയുന്നത് ദിലീപ് നല്ലവനെന്നാണ്. പിസിയുടെ മകന്‍ ഷോണും അച്ഛന്റെ പാതയിലാണ്. ഷോണും സിനിമയുമായി അണിയറ ബന്ധം പുലര്‍ത്തുന്ന ആളാണ്. ഇങ്ങനെ ഒരാപത്തു സമയത്ത് രംഗത്തുവന്ന പിസി ജോര്‍ജിനെ അമ്മയിലെടുക്കണമെന്ന് തന്നെയാണ് ദിലീപ് അനുകൂലികളുടെ വാദം. രാഷ്ട്രീയക്കാര്‍ക്ക് അമ്മയില്‍ ഇപ്പോഴും സ്ഥാനവുമുണ്ടല്ലോ. ഇന്നസെന്റ്, മുകേഷ്, ഗണേഷ് എന്നിവര്‍ ജനപ്രതിനിധികളുമാണ്. മത്രമല്ല പിസിയുടെ ചങ്കൂറ്റം അമ്മയ്ക്ക് മറ്റൊരു മുഖം നല്‍കുമെന്നും അവര്‍ വാദിക്കുന്നു. പിസിയുടെ രംഗപ്രവേശനത്തെ ദിലീപും അനുകൂലിക്കുന്നുവെന്നാണ് അറിയാന്‍ കഴിഞ്ഞത്. 

അതേ സമയം പിസിയെ ഏതു വകുപ്പില്‍ അമ്മയില്‍ എടുക്കുമെന്നാണ് ദിലീപ് അനുകൂലികളെ ആശങ്കയിലാഴ്ത്തുന്നത്. സാധാരണ മെമ്പര്‍ഷിപ്പ്, ആയുഷ്‌ക്കാല മെമ്പര്‍ഷിപ്പ്, ഓണററി മെമ്പര്‍ഷിപ്പ് എന്നീ അഗത്വമാണ് അമ്മ നല്‍കുന്നത്. സാധാരണ മെമ്പര്‍ഷിപ്പിന് 6 സിനിമകളില്‍ അഭിനയിക്കുകയും 3 സംവിധായകരുടെ സാക്ഷ്യപത്രവും വേണം. മാത്രമല്ല ഭൂരിപക്ഷ എക്‌സിക്യൂട്ടിവ് തീരുമാനവും വേണം. ഗവേണിംഗ് ബോഡിയാണ് ഇതില്‍ അന്തിമ തീരുമാന മെടുക്കേണ്ടത്. ദിലീപ് അനുകൂലികളെ സംബന്ധിച്ച് പിസിയെ 3 സിനിമകളില്‍ കൂടി അഭിനയിപ്പിക്കാന്‍ ഒരു പ്രയാസവുമില്ല. ഏതെങ്കിലും പടങ്ങളില്‍ തല കാണിപ്പിച്ച് അംഗത്വം എടുക്കാനുള്ള ശ്രമത്തിലാണ് അവര്‍. വേണ്ടി വന്നാല്‍ ഓണററി മെമ്പര്‍ഷിപ്പ് പോലും നേടിക്കൊടുക്കുമെന്നാണ് അവരുടെ നിഗമനം.

അതേ സമയം പിസി ജോര്‍ജിന്റെ രംഗ പ്രവേശനത്തിനെ ഭയപ്പെടുന്ന വമ്പന്‍ താരനിര തന്നെയുണ്ട്. വനിതാ കൂട്ടായ്മകള്‍ ദിലീപ് വിഷയത്തില്‍ ഏറ്റവുമധികം ഏറ്റുമുട്ടിയത് പിസി ജോര്‍ജിനോടാണ്. മാത്രമല്ല ഗണേഷ് കുമാറിന് പിസിയെ പണ്ടേ കണ്ടുകൂടാ. ഒരുകാലത്ത് കുഞ്ഞനുജനായിരുന്നെങ്കിലും ഗണേഷിന്റെ മന്ത്രി സ്ഥാനം കളഞ്ഞതിനു പിന്നിലും പിസിയായിരുന്നു. പിസിയോട് പരസ്യമായി ഏറ്റുമുട്ടാന്‍ ഗണേഷിന് കഴിവില്ലെങ്കിലും രഹസ്യമായി ചരടുവലിക്കും. പിസി വന്നാല്‍ അമ്മയുടെ നേതൃസ്ഥാനം പോലും കൈയ്യടക്കുമെന്ന് പേടിക്കുന്നവരും കുറവല്ല. 

അതേസമയം പിസിയുടെ പേര് നിര്‍ദേശിച്ചാല്‍ ജീവനില്‍ കൊതിയുള്ള നടന്‍മാരോ നടിമാരോ എതിര്‍ക്കാന്‍ സാധ്യതയില്ലെന്നതാണ് സത്യം. അങ്ങനെ എതിര്‍ക്കുന്നവന്റെ ചരിത്രവും ഭൂമിശാസ്ത്രവും ജൈവശാസ്ത്രവും എല്ലാം പിസി തുറന്ന് പറയും. അവരവര്‍ക്ക് അവരവരുടെ ചെയ്തികളെക്കുറിച്ച് നല്ല ബോധ്യമുള്ളതിനാല്‍ ആരും പിസിയോടേറ്റുമുട്ടാന്‍ വരില്ല.

പൊതു നന്മയ്ക്കായിട്ടുള്ള കൂട്ടായ ഫോറം എന്ന ലക്ഷ്യവുമായി തുടങ്ങിയ സംഘടനയാണ് അമ്മ. ഇന്നസെന്റ് പ്രസിഡന്റും മോഹന്‍ലാലും ഗണേഷ് കുമാറും വൈസ് പ്രസിഡന്റുമാരും മമ്മൂട്ടി ജനറല്‍ സെക്രട്ടറിയുമാണ്. 400ലധികം അംഗങ്ങളാണ് അമ്മയിലുള്ളത്. അവശകലാകരന്‍മാരെ സഹായിക്കാനുള്ള കൈനീട്ടം ഉള്‍പ്പെടെയുള്ള നിരവധി പ്രവര്‍ത്തനങ്ങളാല്‍ അമ്മ ഏറെ ശ്രദ്ധേയമാണ്. അവിടേയാക്കാണ് ഒരുകൈ പയറ്റാനായി പിസിയും ചേരുന്നത്.