യുവതിയോട് ബന്ധുവിന്റെ ക്രൂരത
പത്തൊന്പതുകാരിയെ പീഡിപ്പിച്ച കേസില് ബന്ധുവായ യുവാവിനെ തിരുവല്ലം പൊലീസ് അറസ്റ്റ്ചെയ്തു. പാലോട് ഇടിഞ്ഞാര് കുന്നുംപുറം ട്രൈബല് സ്കൂളിന് സമീപം താമസക്കാരനായ കൽറ്റോ (40) ആണ് അറസ്റ്റിലായത്.
ഇക്കഴിഞ്ഞ 25നായിരുന്നു കേസിനാസ്പദമായ സംഭവം. നഗരത്തിലെ ഒരു സ്കൂളിലെ ഹോസ്റ്റല് ജീവനക്കാരിയായ യുവതി രാവിലെ 11ന് ശ്രീകാര്യത്ത് നിന്നും വെഞ്ഞാറമൂട്ടിലെ ബാങ്കിലേക്ക് പോകുന്നതിനുവേണ്ടി ഓട്ടോ കാത്ത് നില്ക്കുന്ന സമയം പ്രതി ബാങ്കില് കൊണ്ടാക്കാമെന്ന് പറഞ്ഞ് ബൈക്കില് കയറ്റി കോവളം വെള്ളാര് വട്ടപ്പാറയിലെ ആളൊഴിഞ്ഞ വീട്ടില് എത്തിച്ച് പീഡിപ്പിച്ചതിന് ശേഷം കടന്ന് കളയുകയായിരുന്നു.
നഗരത്തിലെ അഗതിമന്ദിരത്തില് താമസിച്ച് ജോലി ചെയ്തു വരികയായിരുന്ന പാലോട് സ്വദേശിനിയായ യുവതിയുടെ സ്വഭാവത്തില് പെട്ടെന്നുണ്ടായ മാറ്റം ശ്രദ്ധിച്ച അധികൃതര് കാര്യങ്ങള് ചോദിച്ചപ്പോഴാണ് പീഡനകാര്യം പുറത്തറിയുന്നത്. തുടര്ന്ന് സിറ്റി കമ്മീഷണര്ക്ക് നല്കിയ പരാതിയുടെ അടിസ്ഥാനത്തില് തിരുവല്ലം പൊലീസാണ് ഒളിവില് കഴിഞ്ഞു വന്നിരുന്ന പ്രതിയെ കസ്റ്റഡിയില് എടുത്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തതായി തിരുവല്ലം പൊലീസ് പറഞ്ഞു.
https://www.facebook.com/Malayalivartha
