പെട്രോൾ അടിക്കാൻ പെട്രോൾ പമ്പിൽ പോയ ആളുകൾക്ക് പണികിട്ടി. പെട്രോളിന് പകരം വാഹനത്തിൽ പച്ചവെള്ളം ഒഴിച്ചു. തിരുവനന്തപുരം നെടുമങ്ങാട് ഇന്ത്യന്‍ ഓയില്‍ കോര്‍പറേഷന്റെ കീഴിലുള്ള പെട്രോൾ പമ്പിലാണ് പെട്രോളിന് പകരം പച്ചവെള്ളം ലഭിച്ചത്. നെടുമങ്ങാട് പതിനൊന്നാം കല്ലിലെ ഇന്ത്യന്‍ ഓയില്‍ കോര്‍പറേഷന്റെ കീഴിലുള്ള പമ്പില്‍ നിന്ന് പെട്രോള്‍ അടിച്ച വാഹനങ്ങള്‍ എല്ലാം വഴിയിലായതിനെ തുടര്‍ന്ന് നടത്തിയ അന്വേഷണത്തിലാണ് പെട്രോളിന് പകരം പച്ചവെള്ളമാണ് ഇന്ധന ടാങ്കില്‍ ഉള്ളതെന്ന് വാഹന ഉടമകള്‍ക്ക് മനസിലായത്. തുടര്‍ന്ന് പ്രതിഷേധവുമായി വാഹന ഉടമകള്‍ എത്തിയതോടെ പമ്പ് അധികൃതർ സംഭവം ഒതുക്കി തീർക്കാൻ ശ്രമിച്ചു. കനത്ത മഴയെ തുടര്‍ന്ന് ടാങ്കില്‍ ചോര്‍ച്ചയുണ്ടായെന്നും മഴവെള്ളം ടാങ്കില്‍ കടന്നതാണന്നുമാണ് പമ്പ് നടത്തിപ്പുകാരുടെ വാദം.

പറ്റിക്കപ്പെട്ട കൂടുതല്‍ ആളുകളെത്തുകയും പമ്പ് ജീവനക്കാരുമായി വാക്കേറ്റവുമായി. ഇതിനിടെ നടത്തിപ്പുകാര്‍ സംഭവം അറിഞ്ഞെത്തി ആദ്യം നിഷേധിച്ചെങ്കിലും വിഷയം വഷളാകുമെന്നു കണ്ടതോടെ പ്രശ്ന പരിഹാരത്തിനുള്ള ശ്രമമായി. എന്നാല്‍ നാട്ടുകാര്‍ സംഭവം പോലീസിനെ അറിയിക്കുകയും പ്രതിഷേധവുമായി വാഹന ഉടമകള്‍ പമ്പ് ഉപരോധിച്ചതിനെ തുടര്‍ന്ന് പൊലീസ് എത്തി പമ്പ് അടപ്പിച്ചു.