ദിലീപിനെ ജയിലിൽ ചെന്ന് കാണാത്തതിന്റെ കാരണം വ്യക്തമാക്കി എം.പിയും സിനിമാ സംഘടനയായ അമ്മയുടെ പ്രസിഡന്റുമായ ഇന്നസെന്റ്. താൻ ചെല്ലാത്തതിന്റെ കാരണം ദിലീപിന് വ്യക്തമായി അറിയാമെന്ന് ഇന്നസെന്റ് പറഞ്ഞു.

എം.പി ആയതിനാലാണ് ഞാൻ ജയിലിൽ പോകാതിരുന്നത്. അമ്മയുടെ പ്രസിഡന്റ് മാത്രമായിരുന്നെങ്കിൽ ഇടയ്ക്കിടയ്ക്ക് പോയി കാണുമായിരുന്നു. ഭരണകക്ഷിയുമായി ബന്ധപ്പെട്ട ഒരു ജനപ്രതിനിധി എന്ന നിലയിൽ സ്വാധീനം ചെലുത്താൻ ശ്രമിച്ചെന്ന രീതിയിലുളള വാർത്തകൾ ഉണ്ടാകാതിരിക്കാനാണ് ഞാൻ മാറി നിന്നത്.

ദിലീപിനെ ആരെല്ലാം ജയിലിൽ പോയി കണ്ടോ അവർക്കെല്ലാം അതിനുള്ള അവകാശമുണ്ട്. ഇനിയും പോയി കാണാം. ഒരു വാരികയ്ക്ക് നൽകിയ അഭിമുഖത്തിൽ ഇന്നസെന്റ് പറഞ്ഞു. സ്വന്തം മകൻ കൊലപാതകിയാണെങ്കിലും അച്ഛൻ പോയി കാണില്ലേ എന്നും ഇന്നസെന്റ് ചോദിച്ചു.

ആക്രമിക്കപ്പെട്ട സഹപ്രവർത്തകയെ വിളിച്ച് വിവരങ്ങൾ തിരക്കുകയും ഒപ്പമുണ്ടെന്ന് അവർക്ക് ഉറപ്പ് നൽകുകയും ചെയ്തിരുന്നു. നടിയുടെ ഭാവിവരനെയും വിളിച്ച് സംസാരിച്ചിരുന്നെന്ന് ഇന്നസെന്റ് പറഞ്ഞു.