തനിക്കെതിരായ ഭൂമി കയ്യേറ്റത്തെ സംബന്ധിച്ച പരാതിയിൽ അന്വേഷണം നടത്തിയ ആലപ്പുഴ കളക്ടർ ടി.വി.അനുപമയ്ക്ക് തെറ്റ് പറ്റിയെന്ന വാദവുമായി മന്ത്രി തോമസ് ചാണ്ടി. കളക്ടർക്ക് ഉദ്യോഗസ്ഥർ നൽകിയത് തെറ്റായ വിവരങ്ങളാണ് ഇതാണ് റിപ്പോർട്ടിൽ ഉള്ളതെന്നും തനിക്കെതിരെ ഉയർന്ന ആരോപങ്ങൾ തെറ്റാണെന്ന് തെളിയിക്കുന്നത് വരെ വിശ്രമമുണ്ടാകില്ലെന്നും അദ്ദേഹം വ്യക്തമാക്കി.

കളക്ടറുടെ അന്വേഷണ റിപ്പോർട്ട് സർക്കാരിലേക്ക് പോയിട്ടില്ലെന്നും റിപ്പോർട്ട് അന്തിമമല്ലെന്നും അദ്ദേഹം പറഞ്ഞു. വിഷയത്തിൽ കൂടുതൽ പ്രതികരണങ്ങൾക്ക് താൻ താത്പര്യപ്പെടുന്നില്ലെന്നും തോമസ് ചാണ്ടി പ്രതികരിച്ചു.ഇതിനിടെ എൻസിപി ദേശീയ നേതൃത്വത്തിന്‍റെ പിന്തുണ ലഭിച്ചത് തോമസ് ചാണ്ടിക്ക് ആശ്വാസമായി. മന്ത്രിക്കെതിരായ ആരോപണങ്ങൾ അടിസ്ഥാനരഹിതമാണെന്ന നിലപാടിലാണ് ദേശീയ നേതൃത്വം.