കേരളം സുരക്ഷിതമല്ലെന്ന് വാട്സാപ്പിലൂടെ വ്യാജപ്രചരണങ്ങൾ നടക്കുന്നതിനിടെ അന്യസംസ്ഥാന തൊഴിലാളികളുടെ പ്രശ്നങ്ങൾ നേരിട്ട് കണ്ടറിയാൻ മന്ത്രി ടി പി രാമകൃഷ്ണന്‍ എത്തി. മന്ത്രി കോഴിക്കോട് അന്യസംസ്ഥാന തൊഴിലാളികള്‍ ജോലി ചെയ്യുന്ന സ്ഥലത്തെത്തി അവരുടെ ബുദ്ധിമുട്ടുകളും പ്രശ്നങ്ങളും ആരായുകയായിരുന്നു.

കേരളത്തില്‍ നിങ്ങള്‍ക്ക് പ്രശ്നങ്ങള്‍ ഉണ്ടോയെന്ന് ചോദ്യത്തിന് എല്ലാവരും ഇല്ല എന്നായിരുന്നു മറുപടി പറഞ്ഞത്. സര്‍ക്കാര്‍ ഇതര സംസ്ഥാന തൊഴിലാളികള്‍ക്കായി ഏര്‍പ്പെടുത്തിയ സാമൂഹിക ക്ഷേമ പദ്ധതികളെക്കുറിച്ച് മന്ത്രി വിവരിക്കുകയും കേരളത്തില്‍ അന്യസംസ്ഥാന തൊഴിലാളികള്‍ പൂര്‍ണ്ണമായും സുരക്ഷിതരാണെന്ന് ആവർത്തിച്ച് പറയുകയും ചെയ്തശേഷമാണ് മന്ത്രി മടങ്ങിയത്.

കേരളത്തിലെ ഹോട്ടലുകളില്‍ ജോലി ചെയ്യുന്ന ബംഗാളികള്‍ വ്യാപകമായി ആക്രമണത്തിന് ഇരയാകുന്നുവെന്നും കേരളം സുരക്ഷിതമല്ലെന്ന് കാണിച്ചുകൊണ്ടുള്ള കൊലപാതക, ആത്മഹത്യാ ചിത്രങ്ങളാണ് വാട്‌സ് ആപ്പ് വഴി പ്രചരിച്ചിരുന്നത്. ഇതരദേശ തൊഴിലാളികളുടെ വാട്‌സ് ആപ്പ് ഗ്രൂപ്പുകളിലുംനാട്ടിലുള്ള ബന്ധുക്കള്‍ക്കിടയിലുമാണ് വ്യാജപ്രചരണം നടക്കുന്നത്. ഈ സാഹചര്യത്തിലാണ് പ്രശ്നങ്ങള്‍ കേട്ടറിയാന്‍ മന്ത്രി ടി പി രാമകൃഷ്ണന്‍ എത്തിയത്.