വളരെ ബുദ്ധിമുട്ടി മോഷ്ടിച്ച പേഴ്‌സ് കണ്ട് ആദ്യം ദേഷ്യമായിരിക്കും ആ കള്ളന് തോന്നിയത്. ഇത്രയും കഷ്ടപ്പെട്ടിട്ടും ഒരു രൂപപോലും അതില്‍ ഇല്ലായിരിക്കുന്നു. പകരം കുറെ കാര്‍ഡുകള്‍ മാത്രം. എന്നാല്‍ പണമില്ലാത്ത പേഴ്‌സ് മോഷ്ടിച്ചുവെങ്കിലും കിട്ടിയ വിലപ്പെട്ട രേഖകള്‍ തിരികെ നല്‍കിയിരിക്കുകയാണ് ഈ കള്ളന്‍.

പഴ്‌സിലുണ്ടായിരുന്ന വിലപ്പെട്ട രേഖകള്‍ ഉടമയ്ക്ക് കള്ളന്‍ തപാലിലൂടെയാണ് തിരിച്ചയച്ചത്. വിലപ്പെട്ട രേഖകള്‍ തപാലിലൂടെ കൂലിയടച്ച് വാങ്ങേണ്ടി വന്നത് ബെംഗളുരുവില്‍ ബിരുദ വിദ്യാര്‍ത്ഥിയായ ഹരിശങ്കറിനാണ്. കള്ളന്‍ അടിച്ചുമാറ്റിയത് തിരിച്ചറിയല്‍ കാര്‍ഡ്, ആധാര്‍ കാര്‍ഡ്, എടിഎം കാര്‍ഡ്, പാന്‍ കാര്‍ഡ്, ഡ്രൈവിങ്ങ് ലൈസന്‍സ് ഉള്‍പ്പെടെയുള്ള രേഖകള്‍ അടങ്ങിയ പഴ്‌സ് ആണ്.

ഹരിശങ്കര്‍ പണം പഴ്‌സിനുള്ളില്‍ സൂക്ഷിക്കാതെ പാന്റിന്റെ രഹസ്യ അറയിലായിരുന്നു സൂക്ഷിച്ചിരുന്നത്. ഇതാണ് കള്ളന് വിനയായത്. രേഖകള്‍ നഷ്ടപ്പെട്ട വിഷമത്തില്‍ കഴിയുന്നതിനിടയിലാണ് പോസ്റ്റ്മാന്‍ കൂലിയടിച്ചു വന്ന ഒരു കവറുമായി ഹരിശങ്കറിനെ അന്വേഷിച്ചെത്തിയത്.

ഊരും പേരുമില്ലാതെ എത്തിയ കത്ത് പണം അടച്ചെങ്കിലേ കിട്ടുകയുള്ളു എന്നതിനാല്‍ ആദ്യം ഹരിശങ്കര്‍ ഒന്ന് മടിച്ചുവെങ്കിലും അവസാനം രണ്ടും കല്‍പ്പിച്ച് വാങ്ങിയപ്പോഴാണ് ശരിക്കും ഞെട്ടിയത്. ഒരു രേഖകള്‍ പോലും നഷ്ടപ്പെടുത്താതെ എല്ലാം ഭദ്രമായി ആ കവറില്‍ ഉണ്ടായിരുന്നു.