പ്രധാനമന്ത്രി നരേന്ദ്രമോദിയെ പരിഹസിച്ച് വി.ടി.ബല്‍റാം എം.എല്‍.എ രംഗത്ത്. അര്‍ദ്ധരാത്രിക്ക് പാര്‍ലമെന്റിന്റെ പ്രത്യേക സമ്മേളനം വിളിച്ചുചേര്‍ത്ത് ജി.എസ്.ടി നടപ്പാക്കി അതിന്റെ ക്രെഡിറ്റ് ഒറ്റക്ക് അടിച്ചുമാറ്റാന്‍ മോദി ശ്രമിച്ചു.

എന്നാല്‍ ജി.എസ്.ടി പാളിയപ്പോള്‍ 'അത് ഞാന്‍ മാത്രമല്ല, അവരെല്ലാവരും ഉണ്ട്' എന്ന് ഇന്‍ ഹരിഹര്‍ നഗറിലെ ജഗദീഷ് സ്‌റ്റൈലില്‍ കൈകഴുകാന്‍ നോക്കുകയാണെന്ന് ബല്‍റാം ഫെയ്‌സ്ബുക്കിലൂടെ പറഞ്ഞു. ഒരു രാജ്യം ഒരു നികുതി എന്ന ജി.എസ്ടി ആശയം കോണ്‍ഗ്രസിന്റേത്.

എന്നാല്‍ നടപ്പാക്കലിനേക്കുറിച്ചുള്ള കോണ്‍ഗ്രസിന്റെ മുന്നറിയിപ്പുകള്‍ ഒന്നും പരിഗണിക്കാനുള്ള ജനാധിപത്യ മര്യാദ കാണിക്കാതെ നികുതി നിരക്ക് വലിയ തോതില്‍ ഉയര്‍ത്തിയും പല തട്ടുകള്‍ സൃഷ്ടിച്ചും എണ്ണിയാലൊടുങ്ങാത്ത ഫോമുകളടക്കമുള്ള സാങ്കേതികത്വങ്ങള്‍ വര്‍ദ്ധിപ്പിച്ചും യാതൊരു മുന്നൊരുക്കമോ ബോധവല്‍ക്കരണമോ നടത്താതെ നരേന്ദ്ര മോദി സര്‍ക്കാര്‍ രാജ്യത്ത് ഒറ്റയടിക്ക് അടിച്ചേല്‍പ്പിച്ച ജി.എസ്.ടി ഇന്ന് ഈ നാടിന്റെ സമ്പദ് വ്യവസ്ഥയെ പൂര്‍ണ്ണമായി താറുമാറാക്കിയിരിക്കുന്നുവെന്നും അദ്ദേഹം ആരോപിച്ചു. ഇക്കാര്യത്തില്‍ കോണ്‍ഗ്രസ് ഉപാദ്ധ്യക്ഷന്‍ രാഹുല്‍ ഗാന്ധി നടത്തിയ പ്രസംഗം ഷെയര്‍ ചെയ്ത് കൊണ്ടായിരുന്നു ബല്‍റാമിന്റെ പോസ്റ്റ്.