ആലപ്പുഴ ജില്ലാ കളക്ടർ ടി.വി.അനുപമയുടെ റിപ്പോർട്ട് എന്താണെന്ന് മനസിലാക്കുമ്പോൾ ചിത്രം വ്യക്തമാകും. തോമസ് ചാണ്ടി ഭൂമി കൈയേറിയിട്ടുണ്ടെന്നാണ് അനുപമയുടെ റിപ്പോർട്ടെങ്കിൽ അദ്ദേഹം രാജിവച്ചതാണെന്ന് കരുതാം. എന്നാൽ അദ്ദേഹം ഭൂമി കൈയേറിയിട്ടില്ലെന്നാണ് റിപ്പോർട്ടെങ്കിൽ അവധിയെടുത്തതാണെന്നും കരുതാം. എന്നാലും മന്ത്രിമാർ സാധാരണ അവധിയെടുക്കാറില്ല. ചികിത്സക്ക് പോകുമ്പോൾ അധികാരം അധിക ചുമതലയായി കൈമാറുക മാത്രമാണ് പതിവ്.

ഏതായാലും ഗതാഗത മന്ത്രി ഭൂമി കൈയേറിയിട്ടില്ലെന്ന് എഴുതാൻ കളക്ടർക്ക് കഴിയില്ലെന്നു തന്നെയാണ് റിപ്പോർട്ട്. നിരവധി തവണ ഏഷ്യാനെറ്റ് സംസാരിക്കുന്ന തെളിവുകൾ പുറത്തുവിട്ടിരുന്നു. അപ്പോഴെല്ലാം തോമസ് ചാണ്ടി ഒഴിഞ്ഞു മാറുകയായിരുന്നു.

തോമസ് ചാണ്ടിയെ കേസിൽ നിന്നും ഒഴിവാക്കാൻ സർക്കാരും സി പി എമ്മും അവരാൽ കഴിയുംവിധം ശ്രമിച്ചിരുന്നു. എന്നാൽ മാധ്യമ ഇടപെടൽ അതിശക്തമായതു കൊണ്ട് മാത്രമാണ് തോമസ് ചാണ്ടിക്ക് സ്വന്തം നിലപാട് വ്യക്തമാക്കാൻ സാഹചര്യം ഉണ്ടായത്. തോമസ് ചാണ്ടിക്കെതിരെ അന്വേഷണം നടത്താൻ പോലും ഒരു ഘട്ടത്തിൽ സർക്കാർ തയ്യാറായില്ല. അന്വേഷണം നടത്തേണ്ട സാഹചര്യം ഏഷ്യാനെറ്റിന്റെ ധാർമ്മിക ഇടപെടൽ വഴി സംഭവിക്കുകയായിരുന്നു. സാധാരണ ഗതിയിൽ ഇത്തരം മാധ്യമ ഇടപെടലുകൾക്ക് വലിയ ഭാവി ഉണ്ടാകാറില്ല. മാധ്യമങ്ങൾ പകുതി വഴിയിൽ പിൻവാങ്ങാറാണ് പതിവ്. എന്നാൽ ഏഷ്യാനെറ്റ് അത്തരമൊരു സ്വാധീനത്തിന് നിന്നു കൊടുത്തില്ല.

തോമസ് ചാണ്ടിയുടെ ജീവിതത്തിൽ ഇങ്ങനെയൊരു സംഭവം അദ്യമായിട്ടായിരിക്കാം. പണത്തിന് മീതെ പരുന്തും പറക്കില്ലെന്നാണ് ചൊല്ല്. ചാണ്ടിയും അങ്ങനെ തന്നെ കരുതിയിരിക്കണം. ഏത് ആരോപണത്തെയും അദ്ദേഹം പണം കൊണ്ട് നേരിടും. ഏഷ്യാനെറ്റ് ലേഖകൻ മാത്രം അതിന് നിന്നു കൊടുത്തില്ല. പകരത്തിന് പകരമെന്നോണം അവരുടെ ഓഫീസ് എറിഞ്ഞു പൊട്ടിച്ചു. പ്രതികളെ പോലും പിടിക്കാൻ സർക്കാരിനു കഴിഞ്ഞില്ല.

തോമസ് ചാണ്ടിക്ക് ഭാഗ്യ കേടിന്റെ സമയമാണ്. അനുപമക്ക് പകരം ഐഎഎസ് ചുളുവിൽ കിട്ടിയ ഏതെങ്കിലും കളക്ടർ ആയിരുന്നെങ്കിൽ ചാണ്ടി പറഞ്ഞതുപോലെയൊക്കെ എഴുതി കൊടുക്കുമായിരുന്നു. ജി.സുധാകരനെയും തോമസ് ഐസക്കിനെയും പോലുള്ള ഗമണ്ടൻ മന്ത്രിമാർ ഉള്ള ആലപ്പുഴയിൽ ചാണ്ടിയുടെ വേലകൾ നടക്കില്ല. അങ്ങനെയാണ് അനുപമ കളക്ടറായത്.