വികസന വിഷയത്തില്‍ സംവാദത്തിനു തയ്യാറുണ്ടോ എന്ന ബിജെപി ദേശീയ അധ്യക്ഷന്റെ വെല്ലുവിളി കേരളം ഏറ്റെടുത്തിട്ടുണ്ടെന്നും അതിനായി അമിത്ഷായെ ക്ഷണിച്ചെങ്കിലും ഒളിച്ചോടാനുള്ള ശ്രമമാണ് ബിജെപി നടത്തുന്നതെന്ന് മുഖ്യമന്ത്രി പിണറായി വിജയന്‍. വികസന ചര്‍ച്ചയെക്കുറിച്ച് വെല്ലുവിളിക്കുകയും അത് സ്വീകരിച്ചപ്പോള്‍ മിണ്ടാതിരിക്കുകയും ചെയ്യുന്നത് മാന്യമായ രാഷ്ട്രീയമല്ല. കുമ്മനത്തിന്റെ യാത്രയില്‍ കേരളത്തിന്റെ വികസനത്തെ കുറിച്ചോ ജനങ്ങളുടെ ജീവിതം മെച്ചപ്പെടുത്തുന്നതിനെ കുറിച്ചോ എന്തൊക്കെയാണ് പറഞ്ഞിരുന്നതെന്ന് അറിയാന്‍ താല്പര്യമുണ്ട്. ഒന്നും പറഞ്ഞിട്ടില്ല എന്നാണു മാധ്യമ വാര്‍ത്തകളില്‍ നിന്ന് മനസ്സിലാക്കുന്നത്. കണ്ണ് ചൂഴ്‌ന്നെടുക്കുമെന്നും കൈ വെട്ടിയെടുക്കുമെന്നും തല കൊയ്യുമെന്നും ഭീഷണി മുഴക്കുന്ന ബി ജെ പി , ആര്‍ എസ് എസ് നേതൃത്വം 'അക്രമത്തിന്റെയും സംഘര്‍ഷത്തിന്റെയും അന്തരീക്ഷത്തിന് അന്ത്യം കുറിക്കുന്നതിനെക്കുറിച്ചു പറഞ്ഞു തുടങ്ങിയതില്‍ സന്തോഷമുണ്ടെന്നും അദ്ദേഹം ഫെയിസ് ബുക്കിലൂടെ അറിയിച്ചു. 

രാഷ്ട്രപതിയും കേന്ദ്ര മന്ത്രിമാരും കേരളത്തിന്റെ പുരോഗതിയെക്കുറിച്ചു ഇവിടെ വന്ന് മതിപ്പു പ്രകടിപ്പിച്ചവരാണ്. സംസ്ഥാനത്തെ ഏക ബിജെപി എം എല്‍ എക്കോ ഇവിടെ നിന്നുള്ള ബിജെപി രാജ്യസഭാ അംഗത്തിനോ നാടിന്റെ പുരോഗതിയെക്കുറിച്ച് സംശയമില്ലെന്ന് മാത്രമല്ല, അവര്‍ യാഥാര്‍ഥ്യങ്ങള്‍ അംഗീകരിച്ച് സര്‍ക്കാരിനെ പ്രശംസിക്കുകയും ചെയ്തിട്ടുണ്ട്. എന്നിട്ടും സംസ്ഥാന ബിജെപി നേതൃത്വം ദേശീയ നേതാക്കളെയും കേന്ദ്രമന്ത്രിമാരെയും കൊണ്ടുവന്ന് നിലവാരം കുറഞ്ഞ ആക്ഷേപങ്ങള്‍ ഉന്നയിപ്പിച്ചു. അത് തെറ്റായിപ്പോയെന്ന് സമ്മതിക്കാനും ജനങ്ങളോട് ക്ഷമാപണം നടത്താനും ബി ജെപി സംസ്ഥാന അധ്യക്ഷന്‍ തയാറാകണമെന്നും മുഖ്യമന്ത്രി ആവശ്യപ്പെട്ടു.

പതിനഞ്ചു ദിവസം കുമ്മനം രാജശേഖരന്‍ നടത്തിയ യാത്ര, കേരളത്തെക്കുറിച്ച് ബിജെപി നടത്തിയ കുപ്രചാരണങ്ങള്‍ തെറ്റാണെന്ന് സ്ഥാപിച്ചു കൊണ്ടാണ് അവസാനിച്ചത്. തെറ്റായ വിവരങ്ങള്‍ നല്‍കി ക്ഷണിച്ചു കൊണ്ടുവന്ന നേതാക്കള്‍ക്ക് കേരളത്തിന്റെ ശാന്തിയും ക്രമസമാധാന ഭദ്രതയും പുരോഗതിയും ബോധ്യപ്പെടുന്ന അനുഭവമാണ് ഉണ്ടായത്. ബി ജെ പി ഭരിക്കുന്ന സംസ്ഥാനങ്ങളില്‍ ഇത്തരം പരിപാടികള്‍ ഉണ്ടാകുമ്പോള്‍ നിരോധനാജ്ഞയും ഇന്റര്‍നെറ്റ് നിരോധവും അറസ്റ്റുകളും മറ്റും കൊണ്ടാണ് നേരിടാറുള്ളത്. ഇവിടെ അത്തരം ഒരു നടപടിയുമില്ലാതെ സമാധാനപരമായി ഈ പ്രകോപനയാത്രക്കു പോലും കടന്നു പോകാന്‍ കഴിഞ്ഞു. കേരള സര്‍ക്കാരിന്റെയും ജനതയുടെയും ഉന്നതമായ നിലവാരമാണ് അതില്‍ പ്രകടമായതെന്നും അദ്ദേഹം ഫെയിസ്ബുക്ക് പോസ്റ്റില്‍ വ്യക്തമാക്കുന്നു.