സരിത നായര്‍ പലപ്പോഴായി എഴുതിയ കത്തുകള്‍ പോലീസിനെ വലയ്ക്കുന്നു. പലഘട്ടങ്ങളായി സരിതയുടേതായി പുറത്തുവന്ന കത്തിലെ പൊരുത്തമില്ലായ്മ പുതിയ അന്വേഷണ സംഘത്തിനും വെല്ലുവിളിയാകും. ഏറ്റവും ഒടുവില്‍ മുഖ്യമന്ത്രി പിണറായി വിജയനു നല്‍കിയ കത്തും ഇതിനു മുമ്പു സരിത പലതവണയായി പുറത്തു വിട്ട കത്തുകളും തമ്മില്‍ യാതൊരുവിധ ബന്ധവുമില്ലെന്നാണു പോലീസ് ചൂണ്ടിക്കാട്ടുന്നത്. 

സോളാര്‍ കമ്മിഷന്റെ മുമ്പാകെ സരിത നല്‍കിയ മൊഴിയില്‍ താന്‍ അട്ടക്കുളങ്ങര ജയിലില്‍ വെച്ച് എഴുതിയ കത്താണു യഥാര്‍ഥ കത്തെന്നാണു സരിത പറഞ്ഞത്. ഈ കത്തില്‍ മുന്‍ മുഖ്യമന്ത്രി ഉമ്മന്‍ ചാണ്ടിയുടെ പേര് പരാമര്‍ശിച്ചിട്ടില്ല. എന്നാല്‍ കഴിഞ്ഞ ദിവസം മുഖ്യമന്ത്രി പിണറായി വിജയനു നല്‍കിയ കത്തില്‍ പ്രധാനആരോപണം മുന്‍ മുഖ്യമന്ത്രി ഉമ്മന്‍ ചാണ്ടിയ്‌ക്കെതിരേയാണ്. സരിത ആദ്യം എഴുതിയ കത്തില്‍ ഉള്‍പ്പെടാത്ത പല നേതാക്കളും പുതിയ കത്തില്‍ ഇടം കണ്ടെത്തിയിട്ടുണ്ട്. 

ഇതിനിടെ പ്രതിപക്ഷ നേതാവ് രമേശ് ചെന്നിത്തലയെയും പി.സി. ജോര്‍ജിനെയും ബന്ധപ്പെടുത്തി സരിതയുടെ പേരിലുള്ള കത്തും വ്യാപകമായി പ്രചരിക്കപ്പെടുന്നുണ്ടെന്ന് മംഗളം റിപ്പോര്‍ട്ട് ചെയ്യുന്നു. ഈ കത്തില്‍ ലൂലു ഗ്രൂപ്പ് ചെയര്‍മാന്‍ എ.എ. യൂസഫലിയുടെ പേരും വലിച്ചിഴച്ചിട്ടുണ്ട്. വല്ലാര്‍പാടത്തു കായല്‍ നികത്തി ഭൂമി വാങ്ങിയത് എം.എ. യൂസഫലിയാണെന്നും ഈ കച്ചവടത്തില്‍ തനിക്കു പങ്കുണ്ടെന്നുമാണു കത്തിലെ പരാമര്‍ശം. കേസ് നടത്താന്‍ ചുമതലപ്പെടുത്തിയ അഭിഭാഷകനു സരിത സ്വന്തം കൈപ്പടയില്‍ എഴുതി നല്‍കിയ കത്തിലാണു രമേശ് ചെന്നിത്തലയുടെയും പി.സി. ജോര്‍ജിന്റെയും പേരുള്ളത്. മുഖ്യമന്ത്രിയായിരുന്ന ഉമ്മന്‍ ചാണ്ടിക്കെതിരേയും കെ.ബി. ഗണേഷ് കുമാറിനെതിരേയും മൊഴി നല്‍കിയാല്‍ തനിക്കു രണ്ടു കോടി രൂപ നല്‍കാമെന്നു പി.സി. ജോര്‍ജ് വാഗ്ദാനം ചെയ്‌തെന്നാണു സരിത കത്തില്‍ ആരോപിച്ചിരിക്കുന്നത്. 

ഈ വിഷയത്തില്‍ രമേശ് ചെന്നിത്തലയും പി.സി. ജോര്‍ജും തമ്മില്‍ സഹകരിച്ചിരുന്നുവെന്നും രമേശ് ചെന്നിത്തലയെ മന്ത്രിസഭയില്‍ ഉള്‍പ്പെടുത്താനുളള നീക്കങ്ങള്‍ക്കു ചുക്കാന്‍ പിടിച്ചിരുന്നത് പി.സി. ജോര്‍ജായിരുന്നുവെന്നുമാണു സരിതയുടെ മറ്റൊരു പരാമര്‍ശം. ഉമ്മന്‍ ചാണ്ടിക്കെതിരേ മൊഴി നല്‍കുന്നതിന് ആദ്യം രണ്ടു കോടി വാഗ്ദാനം ചെയ്ത പി.സി. ജോര്‍ജ് പിന്നീട് അഞ്ചു കോടിയായി ഉയര്‍ത്തിയെന്നും സരിത പറയുന്നു. ആറു പേജിലാണു സരിത ഈ കത്ത് എഴുതിയിരിക്കുന്നത്. 

ഉമ്മന്‍ ചാണ്ടിക്ക് 5.55 കോടി രൂപ നല്‍കിയിരുന്നെന്നും കത്തില്‍ പറയുന്നുണ്ട്. ഡല്‍ഹി വിജ്ഞാന്‍ ഭവനിലെ മീറ്റിങ്ങിനു ശേഷം 2.15 കോടി രൂപയും തിരുവനന്തപുരം വിമാനത്താവളത്തിനു സമീപം കാറില്‍ വച്ച് 1.10 കോടി രൂപയും ഉമ്മന്‍ ചാണ്ടിക്കു വേണ്ടി ഡല്‍ഹിയിലെ സഹായി തോമസ് കുരുവിളയുടെ ഇടപഴഞ്ഞിയിലെ വീട്ടില്‍ വെച്ച് 2.30 കോടി രൂപയും നല്‍കിയെന്നാണു സരിതയുടെ പരാമര്‍ശം. എന്നാല്‍ കഴിഞ്ഞ ദിവസം മുഖ്യമന്ത്രി പിണറായി വിജയനു സരിത നല്‍കിയ പരാതിയില്‍ 1.90 കോടി രൂപ ഉമ്മന്‍ ചാണ്ടിക്കു നല്‍കിയന്നൊണു സരിത ആരോപിച്ചിട്ടുളളത്.