സെക്രട്ടേറിയറ്റിലെ സഹകരണ സംഘത്തില്‍ വ്യാജരേഖ ചമച്ച് വന്‍ വെട്ടിപ്പ്, രണ്ടു കോടിയുമായി സെക്രട്ടറി മുങ്ങി, വാര്‍ത്തയറിഞ്ഞ് ജീവനക്കാര്‍ പരിഭ്രാന്തിയില്‍ കേരള അഡ്മിനിസ്‌ട്രേറ്റീവ് സര്‍വീസ് നടപ്പിലാക്കുന്നതിനെ എതിര്‍ക്കുന്ന ജീവനക്കാരുള്ള സെക്രട്ടേറിയറ്റിലെ സഹകരണസംഘത്തില്‍ വന്‍ വെട്ടിപ്പ്. ജീവനക്കാരുടെ നിക്ഷേപത്തിന്റെ രണ്ട് കോടിയുമായി സെക്ഷന്‍ ഓഫീസര്‍ മുങ്ങി. ഇപ്പോള്‍ സെക്രട്ടേറിയറ്റില്‍ ഭരണം കാര്യക്ഷമമാക്കാനുള്ള കാര്യമല്ല വെട്ടിപ്പാണ് ഇപ്പോള്‍ വലിയ ചര്‍ച്ചാവിഷയം. സെക്രട്ടേറിയറ്റില്‍ രണ്ട് സഹകരണ സംഘങ്ങളാണുളളത്.

കോണ്‍ഗ്രസിന്റെ നേതൃത്വത്തിലുളള സെക്രട്ടേറിയറ്റ് അസോസിയേഷന്‍ നയിക്കുന്ന ഹൗസിംഗ് സഹകരണ സംഘവും സി.പി.എമ്മിന്റെ നേതൃത്വത്തിലുളള എംപ്‌ളോയീസ് അസോസിയേഷന്‍ നയിക്കുന്ന സ്റ്റാഫ് സഹകരണ സംഘവും. ഇതില്‍ കോണ്‍ഗ്രസ് അസോസിയേഷന്റെ ഹൗസിംഗ് സഹകരണ സംഘത്തില്‍ നിന്നാണ് സെക്ഷന്‍ ഓഫീസറും സംഘം സെക്രട്ടറിയുമായ ചന്ദനം രവി എന്ന രവീന്ദ്രന്‍ വ്യാജരേഖ ചമച്ച് വെട്ടിപ്പ് നടത്തി മുങ്ങിയത്. വെട്ടിപ്പ് പുറത്തായതോടെ സെക്രട്ടേറിയറ്റ് ജീവനക്കാര്‍ ഞെട്ടിത്തരിച്ച് നില്‍ക്കുകയാണ്. തങ്ങളുടെ നിക്ഷേപം തിരിച്ചുകിട്ടുമോ എന്ന പരിഭ്രാന്തിയില്‍.

സംഘത്തില്‍ 180 കോടി നിക്ഷേപമുണ്ട്. 180 കോടിയും ജീവനക്കാര്‍ക്ക് വായ്പ നല്‍കിയിരിക്കുകയാണ്. ജീവനക്കാര്‍ക്ക് മാത്രമേ വായ്പ നല്‍കാവൂ എന്നാണ് സംഘത്തിന്റെ നിബന്ധന. എന്നാല്‍ വിരുതനായ സംഘം സെക്രട്ടറി സെക്രട്ടേറിയറ്റിന് പുറത്തുള്ള 16 പേരുടെ പേരില്‍ വായ്പ നല്‍കിയതായി രേഖയുണ്ടാക്കി കോടികള്‍ തട്ടിയെടുക്കുകയായിരുന്നു. ഇതിനായി 16 വ്യാജ ശമ്പള സര്‍ട്ടിഫിക്കറ്റ് ഉണ്ടാക്കി 10 ലക്ഷം മുതല്‍ 15 ലക്ഷം വരെ പല പേരുകളില്‍ പല പ്രാവശ്യമായിട്ടാണ് വായ്പ എടുത്തിരിക്കുന്നത്.

രണ്ടര വര്‍ഷം മുമ്പാണ് രവീന്ദ്രന്‍ സെക്രട്ടറിയായി വന്നത്. നിക്ഷേപം മുഴുവന്‍ ജീവനക്കാര്‍ക്ക് തന്നെ വായ്പയായി നല്‍കിക്കൊണ്ടിരുന്നപ്പോള്‍ ആ കോടികളില്‍ സെക്രട്ടറിയും കണ്ണു വച്ചു. സംഘത്തില്‍ 12 ജീവനക്കാരുണ്ടെങ്കിലും സെക്രട്ടറിയാണ് ഭരണാധിപന്‍. ഡയറക്ടര്‍ ബോര്‍ഡിനും കണ്ടെത്താനാവാത്ത രീതിയില്‍ അതിവിദഗ്ദ്ധമായി വെട്ടിപ്പ് നടത്തിക്കൊണ്ടിരുന്നു.

ഏത് കള്ളത്തരവും കുറേനാള്‍ മറച്ച് വയ്ക്കാം പക്ഷേ, ഒരുനാള്‍ പുറത്ത് വരും എന്ന പ്രകൃതി നിയമം രവീന്ദ്രന് നേരെയും തിരിഞ്ഞു കൊത്തി. ഡിസ്‌ക് തകരാറിലായ രവീന്ദ്രന്‍ ചികിത്സയ്ക്കായി 45 ദിവസം അവധിയില്‍ പോയപ്പോള്‍ പകരം ചുമതലയേറ്റ സജിത എന്ന സെക്രട്ടറിയാണ് വെട്ടിപ്പ് കണ്ടെത്തിയത്. തുടര്‍ന്ന് ഡയറക്ടര്‍ ബോര്‍ഡ് കൂടി നാലംഗ കമ്മിറ്റിയെ വെട്ടിപ്പിന്റെ ആഴം കണ്ടെത്താന്‍ നിയമിച്ചു. പരിശോധനയില്‍ വെട്ടിപ്പ് ഒന്നൊന്നായി പുറത്താവുകയായിരുന്നു. ബോര്‍ഡ് ചോദ്യം ചെയ്തപ്പോള്‍ കുറ്റം സമ്മതിച്ച രവീന്ദ്രന്‍ ഒളിവില്‍ പോവുകയായിരുന്നു.

സഹകരണ ജോയിന്റ് രജിസ്ട്രാറുടെ നിര്‍ദ്ദേശപ്രകാരം അസിസ്റ്റന്റ് ജോയിന്റ് രജിസ്ട്രാറുടെ നേതൃത്വത്തില്‍ മൂന്നംഗ സംഘവും കന്റോണ്‍മെന്റ് പൊലീസും പൊതുഭരണവകുപ്പും അന്വേഷണം നടത്തിവരികയാണ്. ഡയറക്ടര്‍ ബോര്‍ഡ് നല്‍കിയ പരാതിയുടെ അടിസ്ഥാനത്തില്‍ പ്രത്യേക അന്വേഷണ സംഘത്തെ വയ്ക്കാന്‍ ഡി.ജി.പിയും ഉത്തരവിട്ടു.

സെക്രട്ടറി മലയിന്‍കീഴ് സ്വദേശിയാണ് . നേരത്തേ ചിട്ടി പിടിച്ചയിനത്തില്‍ രണ്ട് പ്രമാണങ്ങള്‍ സംഘത്തില്‍ വച്ചിട്ടുണ്ട്. മലയിന്‍കീഴ് ഭാര്യയുടെ പേരിലുള്ള 24 സെന്റിന്റെയും വിളപ്പില്‍ വില്ലേജില്‍ 10 സെന്റിന്റെയും പ്രമാണങ്ങള്‍. ഇത് വിറ്റാല്‍ വെട്ടിച്ച തുക വീണ്ടെടുക്കാനാകുമെന്നാണ് ഡയറക്ടര്‍ ബോര്‍ഡ് ഭാരവാഹികള്‍ പറയുന്നത്.

സെക്ഷന്‍ ഓഫീസറെ ജോലിയില്‍ നിന്ന് പിരിച്ചുവിടാന്‍ നീക്കം തുടങ്ങി. തട്ടിപ്പിനും വ്യാജരേഖ ചമച്ചതിനും കേസെടുത്താണ് അന്വേഷണം. ഹൗസിംഗ് സഹകരണ സംഘത്തില്‍ 3600 പേരാണ് അംഗങ്ങളായിട്ടുള്ളത്. 9 ശതമാനമാണ് പലിശയായി നല്‍കുന്നത്. സ്റ്റാഫ് സഹകരണ സംഘത്തില്‍ 8.5 ശതമാനമേ പലിശയുള്ളൂ. അതുകൊണ്ട് ഇടതുപക്ഷ അനുകൂലികളായ അംഗങ്ങളും ഹൗസിംഗ് സഹകരണ സംഘത്തിലാണ് പണം നിക്ഷേപിക്കുന്നത്. 1980 ലാണ് ഈ സംഘം പ്രവര്‍ത്തിച്ചുതുടങ്ങിയത്. അന്നു മുതല്‍ കോണ്‍ഗ്രസാണ് വിജയിക്കുന്നത്.