അഞ്ചല് ശബരിഗിരി സ്കൂളില് അഞ്ചാംക്ലാസുകാരന് പ്രകൃതിവിരുദ്ധ പീഡനം; പൊലീസ് പോസ്കോ നിയമപ്രകാരം കേസെടുത്തു, പുറത്ത് വരുന്നത് ഞെട്ടിപ്പിക്കുന്ന വിവരങ്ങള്, പുകവലിക്കാനും അശ്ലീല ദൃശ്യം കാണാനും നിര്ബന്ധിച്ചു
കൊല്ലം അഞ്ചലില് അഞ്ചാംക്ലാസുകാരനെ മുതിര്ന്ന വിദ്യാര്ത്ഥികള് പ്രകൃതിവിരുദ്ധ പീഡനത്തിന് ഇരയാക്കിയ സംഭവത്തില് പൊലീസ് പോസ്കോ നിയമപ്രകാരം കേസെടുത്തു. അഞ്ചലിലെ സ്വകാര്യ ഇംഗ്ലീഷ് മീഡിയം സ്കൂളായ ശബരിഗിരി സ്കൂളിലാണ് നാടിനെ നടുക്കിയ സംഭവം നടന്നത്. ഹോസ്റ്റലില് വെച്ചാണ് പീഡനം നടന്നതെന്ന് കുട്ടിയുടെ മൊഴിയില് നിന്ന് വ്യക്തമായി. ഇതേ തുടര്ന്നാണ് അഞ്ച് സീനിയര് വിദ്യാര്ത്ഥികള്ക്കെതിരെ പോസ്കോ നിയമപ്രകാരം കേസെടുത്തതെന്ന് പൊലീസ് മലയാളിവാര്ത്തയോട് പറഞ്ഞു. കേസ് ഒതുക്കി തീര്ക്കാന് ചില ഉന്നതര് ശ്രമിക്കുന്നെന്ന ആരോപണം സ്ഥലം സിഐ അഭിലാഷ് നിഷേധിച്ചു. എന്നാല് കേസിനെക്കുറിച്ച് കുടുതല് വിവരം നല്കാന് സി.ഐ തയ്യാറായില്ല.
ശക്തമായ അന്വേഷണം നടന്നുവരികയാണെന്നും അതിന്റെ ഭാഗമായാണ് കുട്ടികള്ക്കെതിരെയുള്ള അതിക്രമങ്ങള്ക്ക് ചുമത്തുന്ന പോസ്ക്കോ നിയമപ്രകാരം കേസെടുത്തതെന്നും സിഐ പറഞ്ഞു. ഹോസ്റ്റല് മുറിയിലേക്ക് കുട്ടിയെ വിളിച്ച് വരുത്തുകയായിരുന്നെന്ന് കുട്ടിയുടെ രക്ഷിതാക്കള് നല്കിയ പരാതിയില് പറയുന്നു. മൃഗീയമായ പീഡനമാണ് നടന്നതെന്നും അവര് ആരോപിക്കുന്നു. എന്നാല് സംഭവത്തെക്കുറിച്ച് കൂടുതല് പ്രതികരിക്കാന് സ്കൂള് മാനേജ്മെന്റ് തയ്യാറായില്ല. തെറ്റായ വാര്ത്തകള് പ്രചരിപ്പിക്കുന്നത് സ്കൂളിന്റെ പേരിനെ കളങ്കപ്പെടുത്തുന്നതിന് വേണ്ടിയാണെന്നും അവര് പറഞ്ഞു.
റാഗിംഗിനും ലൈംഗിക പീഡനത്തിനും ഇരയായ കുട്ടി അവധിക്ക് വീട്ടിലെത്തിയപ്പോഴാണ് രക്ഷാകര്ത്താക്കളോട് വിവരം പറഞ്ഞത്. തുടര്ന്ന് മാതാവ് കുട്ടിയുമായി കൊല്ലം ചൈല്ഡ് ലൈനിലെത്തി പരാതി നല്കി. ചൈല്ഡ് ലൈന് അധികൃതരുടെ നിര്ദേശപ്രകാരമാണ് എട്ട് മുതല് 12 വരെ ക്ലാസ്സുകളില് പഠിക്കുന്ന അഞ്ച് വിദ്യാര്ഥികള്ക്കതിരെ പൊലിസ് കേസെടുത്തത്. കഴിഞ്ഞ ജൂലൈ മുതല് തന്റെ മുറിയിലെത്തി സീനിയര് വിദ്യാര്ത്ഥികള് പ്രകൃതി വിരുദ്ധ പീഡനം നടത്തിവരുകയായിരുന്നെന്നും പുകവലിക്കുന്നതിനും മൊബൈലിലെ അശ്ലീല ചിത്രങ്ങള് കാണുന്നതിനും നിര്ബന്ധിപ്പിച്ചെന്നും കുട്ടി ചൈല്ഡ് ലൈനിന് നല്കിയ മൊഴിയില് പറയുന്നു. സ്കൂളില് ഇത്തരത്തിലുള്ള സംഭവങ്ങള് മുമ്പും നടന്നിട്ടുണ്ടെന്നും അധികൃതര് ഒതുക്കിതീര്ക്കുകയായിരുന്നെന്നും രക്ഷിതാക്കളും ചില വിദ്യാര്ത്ഥികളും ആരോപിക്കുന്നു.
https://www.facebook.com/Malayalivartha
