പിണറായി സര്ക്കാര് സംഘപരിവാറിന് കുഴലൂതുന്നു; ആര്.എസ്.എസ് ആചാര്യന്റെ ജന്മശതാബ്ദി ആഘോഷിക്കാന് സ്കൂളുകള്ക്ക് നിര്ദേശം
തിരുവനന്തപുരം: സംഘപരിവാറിനെതിരെ പരസ്യമായി യുദ്ധംപ്രഖ്യാപിക്കുകയും രഹസ്യമായി അവരുടെ അജണ്ടകള് നടപ്പാക്കുകയും ചെയ്യുകയാണ് സംസ്ഥാന സര്ക്കാര്. കാവിവല്ക്കരിക്കാനുള്ള സംഘ്പരിവാര് ശ്രമങ്ങളുടെ ഭാഗമായി ജനസംഘം സ്ഥാപകനേതാവും ആര്.എസ്.എസ് ആചാര്യനുമായിരുന്ന ദീന് ദയാല് ഉപാധ്യായയുടെ ജന്മശതാബ്ദി ആഘോഷിക്കാന് സംസ്ഥാനത്തെ ഗവണ്മെന്റ്, എയ്ഡഡ് സ്കൂളുകള്ക്ക് വിദ്യാഭ്യാസ വകുപ്പ് നിര്ദ്ദേശം നല്കി ഉത്തരവിറങ്ങി. ദീന്ദയാല് ഉപാധ്യയുടെ ജന്മശതാബ്ദി സ്കൂളുകളില് ആഘോഷിക്കാന് എല്ലാ സ്കൂളുകളിലെ പ്രഥമ അധ്യാപകര്ക്കും ഉപജില്ലാ വിദ്യാഭ്യാസ ഓഫീസര്മാര്ക്കും വിദ്യാഭ്യാസ ഉപഡയരക്ടര്മാക്കും നിര്ദേശം നല്കുന്ന പൊതു വിദ്യാഭ്യാസ ഡയരക്ടറുടെ സര്ക്കുലര് വിവാദമായതോടെ വിദ്യാഭ്യാസമന്ത്രി കെ.എന് രവീന്ദ്രനാഥ് വിശദീകരണവുമായി രംഗത്തെത്തി. എന്നാല് വിദ്യാഭ്യാസ മന്ത്രിയുടെയും സര്ക്കാറിന്റെയും അനുമതിയോടെയാണ് സര്ക്കുലറെന്ന് പൊതുവിദ്യാഭ്യാസ ഡയറക്ടര് പറയുന്നു.
ദീന് ദയാല് ഉപാധ്യായയുടെ ജന്മശതാബ്ദി ആഘോഷിക്കാന് സര്ക്കാര് നിര്ദ്ദേശം നല്കിയിട്ടില്ലെന്നും ഉത്തരവിറങ്ങിയതിനെ കുറിച്ച് അന്വേഷിക്കുമെന്നും അദ്ദേഹം തിരുവനന്തപുരത്ത് വ്യക്തമാക്കി. സ്കൂളുകളില് വര്ഗീയത പ്രചരിപ്പിക്കാന് അനുവദിക്കില്ലെന്നും മന്ത്രി പറഞ്ഞു. ദീന്ദയാല് ഉപാധ്യായയുടെ ജീവിതത്തെ ആസ്പദമാക്കി കലാപരിപാടികളും ദേശഭക്തി ഗാനങ്ങള് ഉള്പ്പെടെയുള്ള കലാപരിപാടികള് സംഘടിപ്പിക്കാനാണ് പൊതുവിദ്യാഭ്യാസ ഡയറക്ടര് പുറത്തിറക്കിയ ഉത്തരവില് പറയുന്നത്. കേന്ദ്രമാനവ വിഭവ ശേഷി മന്ത്രാലയത്തിന്റെ നിര്ദേശപ്രകാരമാണ് സര്ക്കുലര് ഇറക്കിയതെന്ന് പൊതുവിദ്യഭ്യാസ ഡയരക്ടറുടെ വിശദീകരണം.
യു.പി ക്ലാസുകളിലും സെക്കന്ററിയിലും ആഘോഷത്തോട് അനുബന്ധിച്ച് നടത്തേണ്ട പ്രവര്ത്തനങ്ങളുടെ മാര്ഗരേഖയും സര്ക്കുലറിനൊപ്പമുണ്ട്. യു.പി തലത്തില്, അദ്ദേഹത്തിന്റെ ജീവതമോ ആശയമോ വര്ണിച്ചു കൊണ്ടുള്ള പദ്യം ചൊല്ലല്, ദേശഭക്തി ഗാനം തുടങ്ങിയ സംഘടിപ്പിക്കണം. അസംബ്ലിക്കിടയില് അദ്ദേഹത്തിന്റെ പ്രചോദനാത്മകമായ ജീവിത കഥ അവതരിപ്പിക്കുകയും വേണം. സെക്കന്ററി തലത്തില് ദീന് ദയാല് ഉപാധ്യായയുടെ ആശയങ്ങളുമായി ബന്ധപ്പെട്ട് ചര്ച്ചകള് സംഘടിപ്പിക്കണം. അദ്ദേഹത്തിന്റെ പേരിലുള്ള വിവിധ പദ്ധതികളേക്കുറിച്ച് ഉപന്യസിക്കണമെന്നും മാര്ഗരേഖയില് പറയുന്നു.
കഴിഞ്ഞ ആഗസ്റ്റിലാണ് കേന്ദ്രമാനവ വിഭവ ശേഷി സെക്രട്ടറി അനില് സ്വരൂപ് പൊതുവിദ്യാഭ്യാസസെക്രട്ടറി ഉഷടൈറ്റസിന് പണ്ഡിറ്റ് ദീന്ദയാല് ഉപാധ്യായയുടെ ജന്മദിനം സ്കൂളുകളില് ആഘോഷിക്കണമെന്ന് നിര്ദേശം നല്കിയത്. തുടര്ന്ന് നടപടി ക്രമങ്ങളും മറ്റും വിവരിച്ചുകൊണ്ടുള്ള നിര്ദേശം ഉഷടൈറ്റസ് പൊതു വിദ്യാഭ്യസ ഡയരക്ടര്ക്ക് കൈമാറുകയായിരുന്നു. ഇതുപ്രകാരമാണ് സംഘ പരിവാര് ആശയങ്ങള് കുട്ടികളില് അടിച്ചേല്പ്പിക്കാന് ലക്ഷ്യമിട്ടുള്ള സര്ക്കുലര് പൊതു വിദ്യാഭ്യാസ ഡയരക്ടര് ഇറക്കിയത്. പരിപാടികളില് എല്ലാ കുട്ടികളും പങ്കെടുക്കുന്നുവെന്ന് ഉറപ്പുവരുത്തണമെന്നും സര്ക്കുലറില് നിര്ദേശിച്ചിട്ടുണ്ട്. കാവി രാഷ്ട്രീയം മനസിലാക്കാതെ, കേന്ദ്ര സര്ക്കാറിനോടുള്ള വിധേയത്വം അത് പോലെ നടപ്പാക്കാന് ശ്രമിക്കുകയായിരുന്നു വിദ്യാഭ്യാസ വകുപ്പ്.
https://www.facebook.com/Malayalivartha
