ഓഖി ചുഴലിക്കാറ്റ് നാശം വിതച്ച് ദിവസങ്ങള് കഴിഞ്ഞിട്ടും തീരദേശത്ത് പ്രതിഷേധം പുകയുന്നു, ഇന്ന് രാജ്ഭവന് മാര്ച്ച്
ഓഖി ചുഴലിക്കാറ്റ് ദുരന്തത്തെ തുടര്ന്നുള്ള രക്ഷാപ്രവര്ത്തനങ്ങളില് കേന്ദ്രസംസ്ഥാന സര്ക്കാറുകള് ഫലപ്രദമായി പ്രവര്ത്തിക്കാത്തതില് പ്രതിഷേധിച്ച് തിരുവനന്തപുരം ലത്തീന് അതിരൂപതയുടെ നേതൃത്വത്തില് തിങ്കളാഴ്ച രാവിലെ 11ന് രാജ്ഭവനിലേക്ക് മാര്ച്ച് നടത്തും. ആര്ച്ച് ബിഷപ് ഡോ. എം. സൂസപാക്യം ഉദ്ഘാടനം ചെയ്യും. പാളയം സെന്റ് ് ജോസഫ് കത്തീഡ്രല് ദേവാലയത്തില്നിന്ന് രാവിലെ പ്രകടനം ആരംഭിക്കും.
ഒരു ദിവസത്തെ ജോലി ഒഴിവാക്കി എല്ലാവരും മാര്ച്ചില് പങ്കെടുക്കണമെന്നാണ് ആഹ്വാനം. മത്സ്യത്തൊഴിലാളികളുടെ പ്രശ്നങ്ങള്ക്കു പരിഹാരം കാണാന് കേന്ദ്രത്തില് ഫിഷറീസ് മന്ത്രാലയം വേണമെന്നും ദുരിതബാധിത പ്രദേശങ്ങള് പ്രധാനമന്ത്രി നരേന്ദ്ര മോഡി സന്ദര്ശിക്കണമെന്നും അടക്കമുള്ള ആവശ്യങ്ങളാണ് മത്സ്യത്തൊഴിലാളികള് ഉന്നയിക്കുന്നത്.
ദുരന്തത്തില് മരിച്ചവര്ക്കും കടലില് അകപ്പെട്ടവര്ക്കും കാണാതായവര്ക്കുമായി ഇന്നലെ ദേവാലയങ്ങളില് പ്രത്യേക പ്രാര്ഥന സംഘടിപ്പിച്ചിരുന്നു. പൂന്തുറയില് മനുഷ്യച്ചങ്ങല തീര്ത്താണു മത്സ്യത്തൊഴിലാളികള് പ്രതിഷേധിച്ചത്. സംസ്ഥാന സര്ക്കാരിന്റെ നഷ്ടപരിഹാര പാക്കേജ് അപര്യാപ്തമാണെന്നു ചൂണ്ടിക്കാട്ടിയ ലത്തീന് സഭയ്ക്ക് തങ്ങളുന്നയിച്ച ആവശ്യങ്ങളിന്മേല് സര്ക്കാര് കൃത്യമായ മറുപടി നല്കിയിട്ടില്ലെന്ന പരാതിയുമുണ്ട്. ഈ സാഹചര്യത്തിലാണ് പ്രധാനമന്ത്രിതന്നെ ദുരന്തബാധിത പ്രദേശങ്ങള് സന്ദര്ശിക്കണമെന്ന ആവശ്യം മുന്നോട്ടുവയ്ക്കുന്നത്.
ലത്തീന് അതിരൂപത ഇന്നലെ പ്രാര്ഥനാ ദിനമായാണ് ആചരിച്ചത്. എല്ലാ പള്ളികളിലും ഇടയലേഖനവും വായിച്ചു. ദുരന്തനിവാരണ സംവിധാനങ്ങള് ക്രിയാത്മകമായി പ്രവര്ത്തിച്ചില്ലെന്ന് ആര്ച്ച് ബിഷപ് ഡോ. സൂസൈപാക്യത്തിന്റെ സന്ദേശത്തില് വിമര്ശിച്ചു. പൂന്തുറ സെന്റ് തോമസ് പള്ളിയില് മലങ്കര കത്തോലിക്കാ സഭാ തിരുവനന്തപുരം അതിരൂപതാ സഹായമെത്രാന് സാമുവല് മാര് ഐറനിയോസ് തിരുക്കര്മങ്ങള്ക്കു നേതൃത്വം നല്കി.
ഓഖി ദുരന്തത്തില്പെട്ട് കാണാതായ നൂറുകണക്കിന് മത്സ്യത്തൊഴിലാളികളെ എത്രയും വേഗം കണ്ടെത്താനുള്ള സംവിധാനം ഏര്പ്പെടുത്തുക, ഓഖി ദേശീയ ദുരന്തമായി പ്രഖ്യാപിക്കുക, നഷ്ടം സംഭവിച്ചവര്ക്കുള്ള പുനരധിവാസ പാക്കേജ് സമയബന്ധിതമായി നടപ്പാക്കുക തുടങ്ങിയ ആവശ്യങ്ങള് ഉന്നയിച്ചാണ് മാര്ച്ച്.
https://www.facebook.com/Malayalivartha
