എറണാകുളത്തെ ബാങ്ക് ഓഫ് ബറോഡയുടെ കെട്ടിടത്തില്‍ തീപ്പിടിത്തമുണ്ടായി. ടിഡി റോഡിലെ കെട്ടിടത്തിലാണ് തീപിടിച്ചത്. സമീപ പ്രദേശത്തുള്ളവരാണ് തീ കത്തുന്നത് കണ്ടത്.

രാവിലെ ആറരയോടെയായിരുന്നു ഇവർ കണ്ടത്. ഇതിനെത്തുടർന്ന് അഗ്നി ശമനസേനയെത്തി തീ അണച്ചെങ്കിലും ബാങ്ക് ഓഫ് ബറോഡയുടെ എറണാകുളം റീജ്യണല്‍ ഓഫീസിന്റെ ഒരു ഭാഗം പൂര്‍ണ്ണമായും കത്തിനശിക്കുകയായിരുന്നു. നിരവധി രേഖകളടക്കം വന്‍ നാശനഷ്ടമാണ് സംഭവിച്ചിരിക്കുന്നത്.

ഷോര്‍ട്ട് സര്‍ക്യൂട്ടാണ് തീപിടിത്തത്തിന്റെ കാരണമെന്നാണ് പ്രാഥമിക നിഗമനം. ബാങ്ക് ഉദ്യോഗസ്ഥരെത്തി തീപിടിത്തത്തില്‍ അവശേഷിക്കുന്ന രേഖകള്‍ പരിശോധിച്ചുവരികയാണ്. കെ.എസ്.ഇ.ബി. സംഘമടക്കമുള്ളവര്‍ സംഭവ സ്ഥലത്തെത്തി പരിശോധന നടത്തി.