ജീവിതത്തിലെ ഏറ്റവും ബുദ്ധിമുട്ടുള്ള ഘട്ടത്തിലൂടെ കടന്നു പോയപ്പോഴും തന്റെ പുഞ്ചിരിക്ക് പിന്നിലുള്ള കാര്യങ്ങള്ഡ പറയുകയാണ് മഞ്ജു വാര്യര്‍. ഏത് പ്രതിസന്ധിയിലും തളരാത്ത പുഞ്ചിരിയും ആത്മവിശ്വാസവും തന്നെയാണ് സിനിമയിലേയ്ക്ക് പഴയതിലും ശക്തിയായി തിരിച്ചു വന്ന് വീണ്ടും ആരാധകരുടെ മനസ്സിലേറാന്‍ അവര്‍ക്ക് സഹായകമായത്. ജീവിതത്തില്‍ ഏതവസരത്തിലും സന്തോഷം കണ്ടെത്താന്‍ ശ്രമിക്കുന്ന ആളാണ് താനെന്ന് മഞ്ജു വാര്യര്‍ പറയുന്നു. ഒരു മാധ്യമത്തിന് നല്‍കിയ അഭിമുഖത്തിലാണ് തന്റെ സന്തോഷകരമായ ജീവിത രഹസ്യത്തെക്കുറിച്ച് മഞ്ജു മനസ്സ് തുറന്നത്. 

ജീവിതത്തില്‍ ഏതവസരത്തിലും സന്തോഷം കണ്ടെത്താന്‍ ശ്രമിക്കുന്ന ആളാണ് ഞാന്‍. വിവാഹത്തിന് ശേഷം സിനിമ വിട്ടു നിന്ന് സമയത്തും ഞാന്‍ പൂര്‍ണ്ണ സന്തോഷവതിയായിരുന്നു. ഒരിക്കലും ഒന്നിനോടും അഡ്ജസ്റ്റ് ചെയ്യാന്‍ ശ്രമിക്കുകയായിരുന്നില്ല. ആദ്യകാലത്ത് സിനിമയിലുണ്ടായിരുന്ന മൂന്നു വര്‍ഷം വലിയ തിരക്കായിരുന്നു. അന്ന് അത് ആസ്വദിച്ചു. പിന്നീട് വിവാഹത്തിന് ശേഷം വെറുതെ ഇരുന്നപ്പോഴു, അത് നന്നായി ആസ്വദിച്ചു. വീണ്ടും തിരിച്ചെത്തിയപ്പോഴും അതേ പോലെ തന്നെ സന്തോഷവതിയാണ്' മഞ്ജു പറയുന്നു. 

ഇപ്പോഴത്തെ ജീവിതം ഒരു പുനര്‍ജന്മമാണ്. ഒന്നില്‍ നിന്ന് തുടങ്ങിയതാണെല്ലാം. സിനിമ വിജയിക്കുന്നതിന്റെ അടിസ്ഥാനത്തില്‍ ജീവിതത്തെ അളക്കാന്‍ ഒരിക്കലും സാധിക്കില്ലെന്ന് മറ്റാരേക്കാളും നന്നായി എനിക്കറിയാം. 

ഞാന്‍ എപ്പോള്‍ പുറത്തു പോകുമ്പോഴും ആളുകള്‍, പ്രത്യേകിച്ച് പ്രായമായ സ്ത്രീകളൊക്കെ വന്ന് സ്‌നേഹത്തോടെ കെട്ടിപ്പിടിക്കാറുണ്ട്. 

ഓടിവന്ന് അവര്‍ സ്‌നേഹത്തോടെ ചേര്‍ത്തു പിടിക്കും. എന്റെ നെറ്റിയില്‍ ഉമ്മവയ്ക്കും. വളരെ സ്വാതന്ത്ര്യത്തോടെ എന്റെ കൈയ്യെടുത്ത് അവരുടെ കൈയ്യില്‍ ചേര്‍ത്തു വച്ച് പറയും ഞങ്ങള്‍ മോള്‍ക്കു വേണ്ടി പ്രാര്‍ത്ഥിക്കുന്നുണ്ടെന്ന്. അത്രയും പേര്‍ നിങ്ങളെ സ്‌നേഹിക്കാന്‍ ഉണ്ടാവുക എന്നത് വെറുമൊരു ഭാഗ്യമല്ല. അതൊരു താരത്തിനും കിട്ടുന്ന സ്‌നേഹമല്ല.