ഹരിപ്പാട് ജലജ വധക്കേസില്‍ രണ്ടുവര്‍ഷത്തിനുശേഷം ഗള്‍ഫില്‍ നിന്നും വന്നയാള്‍ അറസ്റ്റിലായെങ്കിലും ദുരൂഹത വിട്ടൊഴിയുന്നില്ല. പെട്ടെന്നുണ്ടായ പ്രകോപനത്താലാണ് ഈ മൃഗീയമായ കൊലപാതകമെന്നു വിശ്വസിക്കാന്‍ സമീപവാസികളും നാട്ടുകാരും തയാറാവുന്നില്ല. ഫോട്ടോഗ്രാഫറായിരുന്ന പ്രതി സജിത്തിന് ക്രിമിനല്‍ പശ്ചാത്തലം ഉള്ളതായോ സ്വഭാവദൂഷ്യമുള്ളതായോ ആര്‍ക്കും സൂചന പോലുമില്ലായിരുന്നു.

ഇരുമ്പുവടി കൊണ്ടുള്ള നിരവധി അടികളാണ് ജലജയുടെ തലയ്‌ക്കേറ്റിരുന്നത്. തെളിവ് നശിപ്പിക്കുന്നതിന്റെ ഭാഗമായി ഏതോ ലായനി ഉപയോഗിച്ച് തറ കഴുകി വൃത്തിയാക്കി മുളക് പൊടി വിതറിയിരുന്നു. ഇതെല്ലാം ആസൂത്രിത കൊലപാതകമെണന്ന സംശയമാണെന്ന് നാട്ടുകാര്‍ ചൂണ്ടിക്കാട്ടുന്നു. 

സജിത്ത് രണ്ട് വര്‍ഷത്തോളം പള്ളിപ്പാട് ജങ്ഷനില്‍ വീഡിയോ എഡിറ്റിങ് സ്ഥാപനം നടത്തിയിരുന്നു. ഫ്രീലാന്‍സ് ഫോട്ടോഗ്രാഫറായും ജോലി ചെയ്തിരുന്നു. ഇയാള്‍ കടുത്ത സാമ്പത്തിക ബാധ്യതയിലാണെന്നും പറയപ്പെടുന്നു. സമീപകാലത്താണ് തൊഴില്‍ തേടി ഖത്തറിലേക്ക് പോയത്. കൊലയ്ക്ക് ശേഷം സ്വര്‍ണാഭരണങ്ങളും പണവും നഷ്ടപ്പെട്ടിരുന്നുവെങ്കിലും ജലജയുടെ കമ്മല്‍ കളവ് പോയിരുന്നില്ല. 

ഇവരുടെ വീട്ടിലെ നായ കുരച്ച് ശബ്ദമുണ്ടാക്കാതിരുന്നതും മോഷണശ്രമമല്ല കൊലപാതക കാരണമെന്നും ജലജയ്ക്കു പരിചിതനായ വീട്ടില്‍ വരാറുള്ള ആരെങ്കിലുമായിരിക്കും കൃത്യം നടത്തിയതെന്നുമുള്ള നിഗമനത്തില്‍ പോലീസിനെ എത്തിച്ചു. തുടര്‍ന്ന് ലോക്കല്‍ പോലീസും െ്രെകംബ്രാഞ്ചും അന്വേഷിച്ചെങ്കിലും ഒരു സൂചനയും ലഭിച്ചില്ല. 

അന്വേഷണവുമായി ബന്ധപ്പെട്ട് സമീപവാസികളേയും സംശയിക്കപ്പെട്ടവരേയും നിരവധി തവണ ചോദ്യം ചെയ്യുകയും വിരലടയാളം രേഖപ്പെടുത്തുകയും ചെയ്തു. മാനസികവും ശാരീരികവുമായ പീഢനങ്ങള്‍ അനുഭവിച്ച നിരവധി പേരാണ് പ്രദേശത്തുള്ളത്. ലോക്കല്‍ പോലീസിന്റെ അന്വേഷണം തൃപ്തികരമല്ലെന്ന ആരോപണം ശക്തമായതോടെ ആഭ്യന്തര മന്ത്രിയായിരുന്ന രമേശ് ചെന്നിത്തല അന്വേഷണം െ്രെകം ബ്രാഞ്ചിന്‌ െകെമാറി. 

ഇതിനിടയില്‍ ഉന്നതതല ഇടപെടല്‍ ഉണ്ടായതായും കൊലപാതകത്തിന് പിന്നില്‍ സാമുദായിക സാമ്പത്തിക പ്രബലരാണെന്നുമുള്ള ആക്ഷേപവും ഉയര്‍ന്നു. തുടര്‍ന്ന് അന്വേഷണം സി.ബി.ഐ.യ്ക്ക് വിടുന്നതായി പ്രഖ്യാപനമുണ്ടായെങ്കിലും അപ്പോഴേക്കും തെരഞ്ഞെടുപ്പും തുടര്‍ന്ന് ഭരണമാറ്റവും ഉണ്ടായി. ഇടത് സര്‍ക്കാര്‍ അധികാരത്തില്‍ വന്ന ശേഷം സുരനും ബന്ധുക്കളും ചേര്‍ന്ന് മുഖ്യമന്ത്രിക്ക് നിവേദനം നല്‍കി. ഇതേ തുടര്‍ന്ന് എസ്.പി.കെ.എസ്.സുദര്‍ശനന്റെ നേതൃത്വത്തിലുള്ള െ്രെകംബ്രാഞ്ച് സംഘത്തിന് അന്വേഷണ ചുമതല െകെമാറുകയും സജിത്തിനെ പിടികൂടുകയുമായിരുന്നു.

െ്രെകം ബ്രാഞ്ച് അറസ്റ്റ് ചെയ്ത ചേപ്പാട് മുട്ടം പീടികപ്പറമ്പില്‍ സജിത്തിനെ 14 ദിവസത്തേക്ക് റിമാന്‍ഡ് ചെയ്തു. ഖത്തറിലായിരുന്ന സജിത്തിനെ തന്ത്രപരമായി നാട്ടിലേക്ക് വിളിച്ചു വരുത്തി നെടുമ്പാശേരി വിമാനത്താവളത്തില്‍ വെച്ച് അറസ്റ്റ് ചെയ്യുകയായിരുന്നു. 2015 ഓഗസ്റ്റ് 13ന് പട്ടാപ്പകലാണ് നാടിനെ നടുക്കിയ കൊലപാതകം നടന്നത്. 

ജലജയുടെ ഭര്‍ത്താവ് സുരന്റെ ബന്ധു രാജുവിനെ അന്വേഷിച്ച് എത്തിയതാണ് സജിത്ത്. എന്നാല്‍ സജിത്ത് വീട്ടിലെത്തിയപ്പോള്‍ രാജു സ്ഥലത്തില്ലായിരുന്നു. വീടിനുളളില്‍ കയറിയിരുന്ന സജിത്ത് സംസാരമധ്യേ ജലജയോട് മോശമായി പെരുമാറുകയും എതിര്‍ത്തപ്പോള്‍ കമ്പിവടിക്കടിച്ച് കൊലപ്പെടുത്തിയ ശേഷം കടന്നുകളഞ്ഞെന്നാണ് അന്വേഷണ സംഘം കണ്ടെത്തിയത്. 

സുരന്‍ വര്‍ഷങ്ങളായി വിദേശത്തായിരുന്നു. മക്കളായ ആരോമലിനോടും അമ്മുവിനോടുമൊപ്പം ഇവരുടെ പഠനാര്‍ഥം ചൈന്നെയിലായിരുന്നു ജലജയും താമസിച്ചിരുന്നത്. ഓഗസ്റ്റ് ഒമ്പതിന് ബന്ധുവിന്റെ വിവാഹത്തില്‍ പങ്കെടുക്കുന്നതിനായി ഇവര്‍ തനിയെ നാട്ടിലെത്തി. തുടര്‍ന്ന് 13ന് ബാങ്കില്‍ നിന്നും പണം പിന്‍വലിച്ചു വീട്ടിലെത്തിയിരുന്നു. അന്ന് ഉച്ചയ്ക്കാണ് കൊലപാതകം. പിറ്റേ ദിവസമാണ് സംഭവം പുറത്തറിയുന്നത്.