ആര്‍എസ്എസിനെ രൂക്ഷമായി വിമർശിച്ച് മുഖ്യമന്ത്രി പിണറായി വിജയൻ. കണ്ണൂരിലും തിരുവനന്തപുരത്തും നടക്കുന്ന അക്രമസംഭവങ്ങളുടെ പശ്ചാത്തലത്തിലാണ് അദ്ദേഹം ആര്‍എസ്എസിനെ വിമർശിച്ചത്. സിപിഎം തൃശൂര്‍ ജില്ലാ സമ്മേളനത്തിന്റെ പൊതുസമ്മേളനം ഉദ്ഘാടനം ചെയ്തു സംസാരിക്കവെയാണ് അദ്ദേഹം ആര്‍എസ്എസിനെ കുറ്റപ്പെടുത്തിയത്.

'നാടിന്റെ അന്തരീക്ഷം തകര്‍ക്കാനുള്ള ബോധപൂര്‍വമായ ശ്രമങ്ങള്‍ക്ക് ആര്‍എസ്എസ് നേതൃത്വം നല്‍കുന്നു. ഉയര്‍ന്ന കേന്ദ്രങ്ങളില്‍ തീരുമാനിച്ച് നടപ്പിലാക്കുന്ന രീതിയിലാണ് അക്രമങ്ങൾ. നാടിന്റെ സ്വൈര്യവും സമാധാനവും തകര്‍ക്കാനുള്ള ശ്രമമാണ് നടക്കുന്നത്. അക്രമങ്ങള്‍ ഓരോരോ സ്ഥലങ്ങളിലാണ് നടക്കുന്നതെങ്കിലും ഏകതാ രൂപമുണ്ട്- പിണറായി പറഞ്ഞു.

ഉന്നത കേന്ദ്രങ്ങളില്‍ തീരുമാനിച്ച് നടപ്പിലാക്കുന്ന തരത്തിലാണ് ആക്രമണങ്ങൾ. വ്യാപകമായി കള്ളം പ്രചരിപ്പിക്കാന്‍ കഴിവുള്ളവരാണ് ബിജെപിയും ആര്‍എസ്എസും. ഇതിന്റെഭാഗമായി കൂടുതല്‍ സംഭവങ്ങളിലേക്ക് അവര്‍ നീങ്ങുന്നു എന്ന് വേണം ശങ്കിക്കാന്‍. രാജ്യവ്യാപകമായി വലിയ തോതില്‍ സംഘര്‍ഷങ്ങളുണ്ടാക്കാനുള്ള ശ്രമം വേറൊരു രൂപത്തില്‍ ഇവിടെ നടപ്പിലാക്കാനാണ് ശ്രമിക്കുന്നത്‍'- അദ്ദേഹം പറഞ്ഞു.