മഹാത്മാ ഗാന്ധിയുടെ രക്തസാക്ഷിദിനം പോലും ഓര്മ്മയില്ലാതെ മണ്ടത്തരം കാണിച്ച് കോണ്ഗ്രസ് പ്രവര്ത്തകര്
കോണ്ഗ്രസുകാരുടെ ബുദ്ധിയില്ലായ്മയെ പരിഹസിച്ച് സോഷ്യല്മീഡിയ. നമ്മുടെ രാഷ്ട്രപിതാവ് മഹാത്മാ ഗാന്ധിയുടെ രക്തസാക്ഷിദിനം പോലും ഓര്മ്മയില്ലാതെ മണ്ടത്തരം കാണിച്ചിരിക്കുകയാണ് കോണ്ഗ്രസ് പ്രവര്ത്തകര്. തിരുവനന്തപുരം പേരൂര്ക്കടയിലെ കോണ്ഗ്രസ് പട്ടം ബ്ലോക്ക് കമ്മറ്റിയാണ് ജനുവരി 30ന് ആചരിക്കേണ്ട മഹാത്മാ ഗാന്ധി രക്തസാക്ഷി ദിനം ഡിസംബര് 30ന് തന്നെ ആചരിച്ച് മാതൃകയായത്. ഗാന്ധിജിയുടെ ഫോട്ടോ വച്ച് വിളക്ക് കൊളുത്തി ഹാരാര്പ്പണം നടത്തിയാണ് പേരൂര്ക്കട പ്രദേശത്തെ കോണ്ഗ്രസ് പ്രവര്ത്തകര് ഗാന്ധിജിയുടെ രക്തസാക്ഷി ദിനം ആചരിച്ചത്.
ബ്ലോക്ക് പ്രസിഡന്റ് മണ്ണാമൂല രാജന്റെ നേതൃത്വത്തിലായിരുന്നു ആചരണം. അബദ്ധമാണെന്നറിഞ്ഞതിനെ തുടര്ന്ന് കോണ്ഗ്രസുകാര് ഫോട്ടോയും നിലവിളക്കും എടുത്തുമാറ്റുകയായിരുന്നു. അപ്പോഴേക്കും വീഡിയോയും ഫോട്ടോകളും സോഷ്യല് മീഡിയയില് പ്രചരിച്ചിരുന്നു. പതിവില്ലാതെ ഗാന്ധിജിയുടെ ഫോട്ടോയ്ക്ക് മുമ്പില് വിളക്കു കെളുത്തി വച്ചിരിക്കുന്നത് കണ്ട ചില നാട്ടുകാര് പ്രവര്ത്തകരോട് കാര്യം തിരക്കിയപ്പോള് രാക്തസാക്ഷി ദിനത്തെകുറിച്ച് നേതാക്കള് പ്രസംഗിക്കുകയും ചെയ്തുവെന്നാണ് റിപ്പോര്ട്ടുകള്.
പിന്നീട് അബദ്ധം മനസിലാക്കിയതിനെ തുടര്ന്ന് നേതാക്കളെല്ലാം സ്ഥലം വിടുകയായിരുന്നു. അതേസമയം മഹാത്മാഗാന്ധിയെ ഇത്തരത്തില് അവഹേളിച്ചതില് പ്രതിഷേധിച്ച് പ്രദേശത്തെ യൂത്ത് കോണ്ഗ്രസ് പ്രവര്ത്തകര് രംഗത്തെത്തുകയും ചെയ്തു. കോണ്ഗ്രസ് നേതൃത്വം തന്നെ വിമര്ശനവുമായി രംഗത്തെത്തിയിട്ടുണ്ട്. സംഭവം നാട്ടില് പടര്ന്നതോടെ ഫ്ളക്സും ഹാരവും നിലവിളക്കുമെല്ലാം എടുത്തു മാറ്റുകയായിരുന്നു.
https://www.facebook.com/Malayalivartha
