ബല്റാമിനെ തള്ളി ഹസന്...ബല്റാം പറഞ്ഞത് പാര്ട്ടി നിലപാടല്ലെന്ന് ഹസന്, എല്ലാവരും ആദരിക്കുന്ന നേതാവാണ് എ.കെ.ജി, ഇനി ഇത്തരം പ്രസ്താവനകള് പാടില്ലെന്ന് ബല്റാമിനെ അറിയിച്ചിട്ടുണ്ട്
എ.കെ.ജിക്ക് എതിരായ വി.ടി ബല്റാമിന്റെ പരാമര്ശത്തെ തള്ളി കെ.പി.സി.സി പ്രസിഡന്റ് എം.എം ഹസന്. വി.ടി ബല്റാം പറഞ്ഞത് പാര്ട്ടി നിലപാടല്ലെന്ന് ഹസന് വ്യക്തമാക്കി. ഇനി ഇത്തരം പ്രസ്താവനകള് പാടില്ലെന്ന് ബല്റാമിനെ അറിയിച്ചിട്ടുണ്ട്. എല്ലാവരും ആദരിക്കുന്ന നേതാവാണ് എ.കെ.ജിയെന്നും ഹസന് പറഞ്ഞു.
തൃത്താല എം.എല്.എ വി.ടി ബല്റാം നടത്തിയ പ്രസ്താവനക്കെതിരെ വിവിധകോണുകളില് നിന്ന് വിമര്ശനങ്ങള് ഉയരുന്നതിനിടെയാണ് നിലപാട് വ്യക്തമാക്കി കെ.പി.സി.സി പ്രസിഡന്റ് എം.എം ഹസനും രംഗത്തെത്തിയത്. ബല്റാമിന്റെ പ്രസ്താവനയെ വിമര്ശിച്ച് കോണ്ഗ്രസ് നേതാക്കളായ കെ.മുരളീധരന്, ഷാനിമോള് ഉസ്മാന് എന്നിവരും രംഗത്തെത്തിയിരുന്നു.
സുശീലയുമായുള്ള പ്രണയത്തെ മുന്നിര്ത്തി എ.കെ.ജി ബാലപീഡകനായിരുന്നെന്നായിരുന്നു ബല്റാമിന്റെ വിവാദ പ്രസ്താവന. ഫേസ്ബുക്കിലുടെയാണ് ബല്റാം പ്രസ്താവന നടത്തിയത്.
മണ്മറഞ്ഞ വ്യക്തിത്വങ്ങള്ക്കെതിരെ വിവാദപരമായ പ്രസ്താവനകള് നടത്തുന്നത് തെറ്റാണെന്ന് എ.ഐ.സി.സി മുന് സെക്രട്ടറി ഷാനിമോള് ഉസ്മാന്. എ.കെ.ജിക്കെതിരെ സമൂഹമാധ്യമത്തിലൂടെ നടത്തിയ പ്രസ്താവന തിരുത്താന് വി.ടി. ബല്റാം എം.എല്.എ തയാറാകണമെന്നും അവര് പറഞ്ഞു.
https://www.facebook.com/Malayalivartha
