കെഎസ്ആര്ടിസി ഫ്ളെക്സി നിരക്ക് ഏര്പ്പെടുത്തുന്നു, വിശേഷദിവസങ്ങളിലായിരിക്കും നിരക്കു വര്ദ്ധന
കെഎസ്ആര്ടിസിയിലും തിരക്ക് കൂടുമ്പോള് നിരക്ക് വര്ധിക്കുന്ന സംവിധാനം നടപ്പാക്കുന്നു. അന്തര് സംസ്ഥാന സര്വീസുകളിലാകും ഇത്തരത്തില് ഫ്ളെക്സി നിരക്ക് ഏര്പ്പെടുത്തുക. ഇതിനു പുറമേ കെഎസ്ആര്ടിസി നടത്തുന്ന പ്രത്യേക സര്വീസുകളില് കര്ണാടക ആര്ടിസി മാതൃകയില് നിരക്കു വര്ധന ഏര്പ്പെടുത്തുന്നതിന് അനുമതി തേടാനും കോര്പറേഷന് തീരുമാനിച്ചു. വിശേഷ ദിവസങ്ങളിലെ സര്വീസുകളിലാണ് നിരക്കു വര്ദ്ധിപ്പിക്കാനായി ആലോചിക്കുന്നത്.
കര്ണാടക ആര്ടിസിയുടെ മാതൃകയില് ശൗചാലയ സൗകര്യമുള്ള ബസുകളും സ്ലീപ്പര് സൗകര്യമുള്ള ബസുകളും പുറത്തിറക്കുന്നതിന്റെ സാധ്യത പരിശോധിക്കുന്നതിനും ഭാവിയില് ഇത്തരം ബസുകള്ക്കു രജിസ്ട്രേഷന് സൗകര്യം ഒരുക്കുന്നതിനു മോട്ടോര്വാഹന നിയമത്തിലും ചട്ടത്തിലും ഭേദഗതി വരുത്തുന്നതു സംബന്ധിച്ചും കോര്പറേഷന് ആലോചന തുടങ്ങി.
അന്തര്സംസ്ഥാന സര്വീസുകളില് ഫെബ്രുവരി, മാര്ച്ച് മാസങ്ങളിലാകും പുതിയ രീതിയില് ഫ്ളെക്സി ചാര്ജ് നടപ്പാക്കുക. തിരക്കു കുറവുള്ള ദിവസങ്ങളില് ഫ്ളെക്സി ഫെയറില് 15 ശതമാനം നിരക്ക് ഇളവ് അനുവദിക്കുന്നുണ്ട്. ഏപ്രില് മുതല് 10 ശതമാനം ആക്കാനാണ് തീരുമാനം.
കൂടാതെ എറണാകുളം, കോഴിക്കോട്, തലശേരി, തിരുവനന്തപുരം എന്നിവിടങ്ങളില്നിന്നു പോണ്ടിച്ചേരിയിലേക്കും കൊച്ചി, കോഴിക്കോട് എന്നിവിടങ്ങളില്നിന്നു ഗോവയിലേക്കും പുതിയ സര്വീസുകള് തുടങ്ങുന്നതിന് സര്ക്കാരില്നിന്ന് അനുമതി തേടുന്നതിനും കെഎസ്ആര്ടിസി മാനേജ്മെന്റ് തീരുമാനിച്ചു.തിരക്കുള്ള സമയങ്ങളില് 10 ശതമാനം വരെ ടിക്കറ്റ് നിരക്കു വര്ധിപ്പിക്കാന് വ്യവസ്ഥ ചെയ്യുന്ന പുതിയ സംവിധാനം സാധാരണയാത്രക്കാര്ക്ക് തിരിച്ചടിയാകും.
https://www.facebook.com/Malayalivartha
