കേന്ദ്ര സംസ്ഥാന സർക്കാരുകൾ പ്രവാസികളെ മറന്നുകൊണ്ട് ഭരണം നടത്തുന്നുവെന്ന് കെ.പി.സി.സി പ്രസിഡന്റ് എം.എം.ഹസൻ. പ്രവാസികളായ ഇന്ത്യക്കാരുടെ പ്രശ്നം പരിഹരിക്കാൻ ഫലപ്രദമായ സംവിധാനമില്ലെന്നും യു.പി.എ സർക്കാർ കൊണ്ടുവന്ന പ്രവാസികാര്യ ക്ഷേമവകുപ്പ് മോദി സർക്കാർ നിർത്തലാക്കിയെന്നും ഇത് പ്രവാസികളോട് കാട്ടിയ കടുത്ത അനീതിയാണെന്നും അദ്ദേഹം പറഞ്ഞു. കേരള പ്രദേശ് പ്രവാസി കോൺഗ്രസിന്റെ നേതൃത്വത്തിൽ ഇന്ദിരാഭവനിൽ സംഘടിപ്പിച്ച പ്രവാസി ഭാരത് ദിവസ് ആചരണം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

പ്രവാസിക്ഷേമകാര്യ വകുപ്പ് വന്ധീകരിച്ച പ്രധാനമന്ത്രിയാണ് മോദിയെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. അമേരിക്കൻ പ്രസിഡന്റ് ട്രംപിന്റെ പുതിയ വിസാ നയവും ഗൾഫ് മേഖലയിലെ തൊഴിൽ പ്രതിസന്ധിയും കാരണം നിരവധി പ്രവാസികളാണ് കേരളത്തിലേക്ക് മടങ്ങിവരാനൊരുങ്ങുന്നത്. പ്രവാസികൾ കടുത്ത വെല്ലുവിളി നേരിടുന്ന കാലഘട്ടത്തിൽ കൂടുതൽ ശ്രദ്ധയും കരുതലും ഈ മേഖലയിൽ ഉണ്ടാകണമെന്നും അദ്ദേഹം പറഞ്ഞു.