അഴിമതി ആരാണ് കൂടുതല്‍ നടത്തിയതെന്ന ചര്‍ച്ചയാണ് സി.പി.എം- സി.പി.ഐ സമ്മേളനങ്ങളില്‍ നടക്കുന്നതെന്നും അഴിമതിരഹിത ഭരണമെന്ന് പറഞ്ഞിട്ട് അഴിമതിയാണ് നടത്തുന്നത്, ഇത് മറച്ച് വയ്ക്കാനുള്ള ബോധപൂര്‍വമായ ശ്രമമാണ് വി.ടി ബല്‍റാമിനെതിരെയുള്ള അക്രമമെന്ന് മുന്‍മുഖ്യമന്ത്രി ഉമ്മന്‍ചാണ്ടി ആരോപിച്ചു. രാഷ്ട്രീയ അസൗകര്യങ്ങള്‍ മറച്ചുവയ്ക്കാന്‍ ജനശ്രദ്ധതിരിച്ചുവിടാനാണ് അക്രമ രീതിയിലുള്ള പ്രതിഷേധം സി.പി.എം നടത്തുന്നത്. നിയമം കയ്യിലെടുത്ത് പ്രതിഷേധിക്കുന്നത് ന്യായീകരിക്കാനാവില്ല. അത് ജനാധിപത്യ ശൈലിയല്ല, ഫാസിസ്റ്റ് രീതിയാണ്.

ബല്‍റാമിന്റെ പ്രസ്താവന ഒഴിവാക്കേണ്ടതായിരുന്നെന്ന് കോണ്‍ഗ്രസ് നേതാക്കളെല്ലാം പ്രതികരിച്ചതാണ്. പാര്‍ട്ടിയുടെ നിലപാടും അതാണ്. അതിന് മറുപടി പറഞ്ഞ് സി.പി.എം വിവാദം അവസാനിപ്പിക്കണമായിരുന്നു. അതിന് പകരം അക്രമം അഴിച്ച് വിട്ടത് ശരിയായ രീതിയല്ലെന്നും ഉമ്മന്‍ചാണ്ടി പ്രതികരിച്ചു. ദുരന്തനിവാരണ ഫണ്ട് ഉപയോഗിച്ച് മുഖ്യമന്ത്രി പാര്‍ട്ടിസമ്മേളനത്തില്‍ പങ്കെടുക്കാന്‍ ഹെലിക്കോപ്ടര്‍ യാത്ര നടത്തിയ നടപടി ഉണ്ടാവാന്‍ പാടില്ലാത്ത തെറ്റാണെന്നും അദ്ദേഹം ജനങ്ങളോട് മാപ്പ് പറയണമെന്നും ഉമ്മന്‍ചാണ്ടി ആവശ്യപ്പെട്ടു.