ഹെലികോപ്ടര്‍ യാത്ര വിവാദമായ സംഭവത്തിൽ വിശദീകരണവുമായി മുഖ്യമന്ത്രി പിണറായി വിജയന്‍.സിപിഎം ഇടുക്കി ജില്ലാസമ്മേളനത്തില്‍ സംസാരിക്കുകയായിരുന്നു അദ്ദേഹം. ഓഖി ദുരിതം സന്ദര്‍ശിക്കാന്‍ വന്ന കേന്ദ്രസംഘത്തെ കാണാനാണ് ഹെലികോപ്റ്ററിൽ പോയത്. മുഖ്യമന്ത്രിയുടെ യാത്രയ്ക്കു പണം നല്‍കുന്നത് സർക്കാരാണെന്നും ഇനിയും ഇത്തരം യാത്രകള്‍ വേണ്ടിവരുമെന്നും അദ്ദേഹം വ്യക്തമാക്കി.

ഇത് സാധാരണ നടക്കുന്ന സംഭവമാണ്. മുമ്പും മുഖ്യമന്ത്രിമാർ ഹെലികോപ്റ്ററിൽ യാത്രനടത്തിയിട്ടുണ്ട്. അതിൽ യാതൊരു അപാകതയും ഇല്ല എന്നും മുഖ്യമന്ത്രി പറഞ്ഞു. ദുരന്ത നിവാരണ ഫണ്ടില്‍നിന്നു പണം കൊടുക്കാന്‍ നിര്‍ദേശിച്ചത് കഴിഞ്ഞ ദിവസമാണ് ശ്രദ്ധയില്‍പ്പെട്ടതെന്നും അപ്പോൾ തന്നെ ഉത്തരവ് പിൻവലിക്കാൻ ആവശ്യപ്പെട്ടുവെന്നും അദ്ദേഹം കൂട്ടിച്ചേർത്തു.

മുന്‍ മുഖ്യമന്ത്രിയും ഇത്തരത്തില്‍ ഇടുക്കിയിലേക്ക് യാത്ര നടത്തിയിരുന്നു. അന്ന് ദുരന്തനിവാരണ ഫണ്ടില്‍നിന്നു പണം ചെലവഴിച്ചാണ്‌ ഇടുക്കിയിലേക്കു ഹെലിക്കോപ്റ്റര്‍ യാത്ര നടത്തിയിരുന്നെന്നും മുഖ്യമന്ത്രി ആരോപിച്ചു.