കര്‍ഷകപെന്‍ഷന്‍ മാസം 1,100 രൂപയാക്കി സംസ്ഥാന സര്‍ക്കാര്‍ ഉത്തരവിറങ്ങി. കൃഷിമന്ത്രി വി.എസ്. സുനില്‍ കുമാര്‍, ധനമന്ത്രി ഡോ. ടി.എം. തോമസ് ഐസക്കുമായി നടത്തിയ ചര്‍ച്ചകള്‍ക്കൊടുവിലാണ് ധനവകുപ്പിന്റെ തീരുമാനം. നേരത്തെ 1,000 രൂപയായിരുന്നു കര്‍ഷക പെന്‍ഷന്‍. നേരത്തെ 3,56,000 പേരാണ് കര്‍ഷക പെന്‍ഷന്‍ വാങ്ങിയിരുന്നത്. പുതുക്കിയ മാനദണ്ഡങ്ങള്‍ അനുസരിച്ച് പെന്‍ഷന് അര്‍ഹരായ കര്‍ഷകരുടെ എണ്ണം 2,99,000 ആണ്.

പെന്‍ഷന്‍ നല്‍കുന്നതിന് പ്രതിമാസം 32.89 കോടി രൂപ അധികം വേണ്ടിവരും. ഈ വര്‍ഷം 546.99 കോടി രൂപ കര്‍ഷകപെന്‍ഷന്‍ ഇനത്തില്‍ വിതരണം ചെയ്തിട്ടുണ്ട്.