ഫെബ്രുവരിയിൽ ഡോ.തോമസ് ഐസക് അവതരിപ്പിക്കാൻ പോകുന്ന ബജറ്റ് മുഖ്യമന്ത്രി പിണറായി വിജയനുള്ള അടുത്ത പണിയായി മാറും. അതിനുള്ള സൂചനകൾ ഡോ.ഐസക് തന്നെ നൽകി കഴിഞ്ഞു.

സേവന നികുതികൾ വർധിപ്പിക്കുമെന്നാണ് ഐസക് പറയുന്നത്. ഭൂനികുതി അടക്കമുള്ളവ വർധിപ്പിക്കേണ്ടി വരുമെന്നാണ് അദ്ദേഹം പറഞ്ഞത്. അതായത് കേരളത്തിലെ ജനങ്ങളോട് എന്തോ വൈരാഗ്യമുണ്ടെന്ന മട്ടിലാണ് ഡോ.ഐസക് മാതൃഭുമി ചാനലിനോട് സംസാരിച്ചത്. മലയാളികൾ ചെയ്തത് ഒരേ ഒരു തെറ്റു മാത്രം. അത് ഡോ.ഐസകിന് മന്ത്രി കസേര നൽകി ധനമന്ത്രിയാക്കി എന്നത് മാത്രമാണ്.

ആദ്യമായാണ് ധനമന്ത്രി മനസു തുറന്നത്. എല്ലാ നികുതികളും വർധിപ്പിക്കുമെന്നാണ് ധനമന്ത്രി പറഞ്ഞതിന്റെ അർത്ഥം. സേവന നിരക്കുകളിൽ മാറ്റം വരുത്തേണ്ടതിനെ കുറിച്ച് സമവായമുണ്ടാക്കണമെന്ന് ധനമന്ത്രി പറഞ്ഞിട്ടുണ്ട്. അതിന്റെ അർത്ഥം എന്താണെന്ന് അദ്ദേഹം വ്യക്തമാക്കിയിട്ടില്ല. സമവായം എന്നാൽ ചർച്ച എന്നാണർത്ഥം. ബജറ്റ് അവതരിപ്പിക്കാൻ ഏതാനും ആഴ്ചകൾ മാത്രമാണ് അവശേഷിക്കുന്നത്. അതിനിടയിൽ ചർച്ച നടത്താൻ സമയമില്ല.

ജി എസ് ടി നടപ്പിലാക്കാൻ പൊതു ജനങ്ങളല്ല ആവശ്യപ്പെട്ടത്. നരേന്ദ്ര മോദിയുടെ ആവശ്യമായിരുന്നു അത്. അപ്പോൾ അതിന്റെ ഫലം അനുഭവിക്കേണ്ടത് മലയാളികളാണെന്ന് തോമസ് ഐസക് പറയുന്നു. നികുതി പിരിക്കാൻ ചെലവാകുന്ന തുകയുടെ നാലിൽ ഒന്നു പോലും ഇപ്പോൾ ലഭിക്കുന്നില്ലെന്നാണ് മന്ത്രിയുടെ പരാതി. അതിനും നമ്മളല്ല കുറ്റക്കാർ. അൻപത് വർഷം മുമ്പുള്ള നികുതിയാണ് ഇപ്പോൾ ഈടാക്കുന്നതാണെന്നും ധനമന്ത്രി പറഞ്ഞു.

സാധന വിലകൾ സ്വാഭാവികമായും ഉയരാൻ സാധ്യതയുണ്ട്. നികുതി പിരിക്കാൻ നിയുക്തരായവർ അപ്രകാരം ചെയ്യാത്തതുകൊണ്ടാണ് സാധാരണക്കാർ അതിന്റെ പാപഭാരം അനുഭവിക്കേണ്ടി വരുന്നത്. ഓരോ സർക്കാരുകൾ അധികാരത്തിൽ വരുമ്പോഴും നികുതി പിരിക്കാൻ നടപടികൾ സ്വീകരിക്കുമെന്നും പറയും. എന്നാൽ സമ്പന്നരിൽ നിന്നും പലപ്പോഴും കൃത്യമായി നികുതി പിരിക്കാറില്ല. കേരളത്തിലെ പല വൻകിട ജുവലറികളും ഇപ്പോഴും ബിൽ നൽകാതെ നികുതി വെട്ടിക്കുന്നുണ്ട്. സംസ്ഥാനത്ത് ഉടനീളം ഇത്തരം തട്ടിപ്പുകൾ വ്യാപകമാണ്. ജുവലറികൾക്ക് പുറമെ പല വൻകിട സ്ഥാപനങ്ങളും ഇത്തരത്തിൽ നികുതി വെട്ടിക്കുന്നുണ്ട്.

വി എസ് മന്ത്രിസഭയിൽ അംഗമായിരിക്കെ തോമസ് ഐസക്ക് അഴിമതിക്കാർക്കെതിരെ നിർഭയമായി നടപടിയെടുത്തിരുന്നു. എന്നാൽ പിണറായി മന്ത്രിസഭയിൽ അംഗമായതോടെ ഐസക്കിന്റെ മട്ടു മാറി. അദ്ദേഹം നിലപാട് മയപ്പെടുത്തി. പഴയ ഐസക്കിനെയല്ല ഇപ്പോൾ കാണുന്നത്. അദ്ദേഹം പൊതുവേ അലസനായി തീർന്നു. സർക്കാരിൽ തനിക്ക് ഒരു ഉത്തരവാദിത്വവുമില്ലെന്ന മട്ടിലാണ് അദ്ദേഹം സഞ്ചരിക്കുന്നത്. കൂടുതൽ സമയവും സ്വന്തം മണ്ഡലത്തിലെ കാര്യങ്ങളാണ് അദ്ദേഹം കൂടുതലായി കൈകാര്യം ചെയ്യുന്നത്.

ഐസക്കും പിണറായിയും തമ്മിലുള്ള അഭിപ്രായ ഭിന്നതയാണ്
പലപ്പോഴും വിഷയമാകുന്നത്. അപ്പോൾ ഐസക് നൽകുന്നത് പണിയാണോ എന്ന് സംശയിക്കേണ്ടിയിരിക്കുന്നു.