സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍റെ മകൻ ബിനോയ് ബാലകൃഷ്ണനെതിരേ ഉയർന്ന ആരോപണം അന്വേഷിക്കണമെന്നാവശ്യപ്പെട്ട് എൻഫോഴ്സ്മെന്‍റ് ഡയറക്ടറേറ്റിനു ബിജെപി പരാതി നൽകി.. ബി.ജെ.പി സംസ്​ഥാന ജനറൽ സെക്രട്ടറി എ.എൻ രാധാകൃഷ്​ണനാണ്​ എൻഫോഴ്​സ്​മെന്റ്​ ഡയറക്​ടർക്ക്​ പരാതി നൽകിയത്​. പണമിടപാടുകളിൽ ഹവാല ഇടപാടുകളും നടന്നിട്ടുണ്ടെന്ന് സംശയമുണ്ട്. സമാനമായ പരാതികൾ കോടിയേരിയുടെ മക്കളുടെ പേരിൽ നേരത്തേയും ഉയർന്നിട്ടുണ്ട്. ഇതേക്കുറിച്ചെല്ലാം സമഗ്ര അന്വേഷണം നടത്തണമെന്നാണ് ബി.ജെ.പിയുടെ ആവശ്യം.

എൻഫോഴ്​സ്​മെന്റ് ഡയറക്​ടറുമായി 15 മിനിറ്റ് കൂടിക്കാഴ്ച നടത്തി. പരാതി ലഭിച്ചതായി ഡയറക്ടർ സ്ഥിരീകരിച്ചെങ്കിലും നടപടികളെക്കുറിച്ച് മാധ്യമപ്രവർത്തകരോട് പ്രതികരിച്ചില്ല. എന്നാൽ പരാതിപ്രകാരം യുക്തമായ നടപടികൾ സ്വീകരിക്കണമെന്ന് ഡയറക്ടർ ഉറപ്പ് നൽകിയതായി എ.എൻ. രാധാകൃഷ്ണൻ പറഞ്ഞു.

നേരത്തെ, സംസ്ഥാന അധ്യക്ഷൻ കുമ്മനം രാജശേഖരൻ എൻഫോഴ്​സ്​മെന്റ്​ അന്വേഷണം വേണമെന്ന്​ ആവശ്യപ്പെട്ടിരുന്നു. മകന്റെ തട്ടിപ്പിനെപ്പറ്റി അറിവുണ്ടായിട്ടും അതിന് കൂട്ടുനിൽക്കുകയാണ് കോടിയേരി ചെയ്തത്. അതിനാൽ സംസ്ഥാന സർക്കാർ കേസെടുത്ത് അന്വേഷിക്കണം. കോടിയേരിയുടെ കുടുംബത്തിന്റെ സാമ്പത്തിക സ്രോതസ്സിനെപ്പറ്റി എൻഫോഴ്​സ്​മെന്റ്​ അന്വേഷിക്കണമെന്നും അദ്ദേഹം ആവശ്യപ്പെട്ടിരുന്നു. ഈ ആവശ്യം ഉന്നയിച്ച് കേന്ദ്രത്തിന് കത്ത് നൽകുകയും ചെയ്​തിരുന്നു.