ജനക്ഷേമ ബജറ്റാകും അവതരിപ്പിക്കുകയെന്ന് ധനമന്ത്രി തോമസ് ഐസക്. ബജറ്റിന് മുന്നോടിയായി നടത്തിയ വാര്‍ത്ത സമ്മേളനത്തിലാണ് അദ്ദേഹം പ്രതീക്ഷകള്‍ പങ്കുവെച്ചത്. സാമൂഹ്യസുരക്ഷക്ക് ബജറ്റ് ഊന്നല്‍ നല്‍കും. ചെലവ് ചുരുക്കല്‍ നടപടികളുണ്ടാവും. ജി.എസ്.ടി നടത്തിപ്പ് മെച്ചപ്പെടുമെന്നാണ് പ്രതീക്ഷയെന്നും ധനമന്ത്രി പറഞ്ഞു.
പൊതുമേഖല സ്ഥാപനങ്ങളുടെ ഓഹരി വിറ്റാണ് കേന്ദ്രസര്‍ക്കാര്‍ ധനകമ്മി 3.5 ശതമാനത്തില്‍ പിടിച്ച് നിര്‍ത്തിയത്. വലതു കാലിലെ മന്ത് ഇടതുകാലിലേക്ക് മാറ്റുകയാണ് ബജറ്റിലുടെ സര്‍ക്കാര്‍ ചെയ്തിരിക്കുന്നതെന്നും ഐസക് കുറ്റപ്പെടുത്തി.

പിണറായി സര്‍ക്കാറിന്റെ മൂന്നാം ബജറ്റാണ് ധനമന്ത്രി തോമസ് ഐസക് അവതരിപ്പിക്കുന്നത്. കടുത്ത സാമ്പത്തിക പ്രതിസന്ധിയെ സംസ്ഥാനം നേരിടുമ്പോഴാണ് വീണ്ടുമൊരു ബജറ്റ് വന്നെത്തുന്നത്. കെ.എസ്.ആര്‍.ടി.സിക്കുള്ള സമഗ്ര പാക്കേജ് ഉള്‍പ്പടെ നിരവധി പ്രഖ്യാപനങ്ങള്‍ കേരളം ബജറ്റില്‍ നിന്ന് പ്രതീക്ഷിക്കുന്നുണ്ട്.