നമ്മുടെ നാട്ടിലെ നിയമമല്ല മറ്റ് രാജ്യങ്ങളില്‍. പ്രത്യേകിച്ചും അറബ് രാജ്യങ്ങളില്‍. എന്തെങ്കിലും ചെറിയ കുറ്റങ്ങള്‍ ചെയ്താല്‍ വല്ല രാഷ്ട്രീയക്കാരേം കാലുപിടിച്ച് രക്ഷപ്പെടാം. എന്നാല്‍ അവിടെച്ചെന്ന് ഇവിടത്തെപ്പോലെ പെരുമാറിയാലോ? ദുബായിലെത്തിയ ഇന്ത്യന്‍ യുവാവിനാണ് ഇത്തരത്തില്‍ പണി കിട്ടിയത്.ഡ്രൈവിങ് ടെസ്റ്റ് പാസാകാന്‍ കഴിയാതിരുന്നതിന് ദുബായ് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അഥോറിറ്റിയെ കളിയാക്കി ഇമെയില്‍ പ്രരിപ്പിച്ചതാണ് ഇയാള്‍ക്ക് വിനയായത്. 500,000 ദിര്‍ഹം അഥവാ ഇന്ത്യന്‍രൂപ 87 ലക്ഷം രൂപ പിഴയും മൂന്നു മാസം ജയില്‍ ശിക്ഷയും ദുബായ് ഫസ്റ്റ് ഇന്‍സ്റ്റന്‍സ് കോടതി ശിക്ഷ വിധിച്ചു.

ഇമെയില്‍ വഴി ആര്‍ടിഎയെ മോശമായി ചിത്രീകരിച്ചു എന്ന കുറ്റത്തിനാണ് 25 വയസുള്ള ഇന്ത്യന്‍ യുവാവിന് ശിക്ഷ കോടതി വിധിച്ചത്. 'ഡ്രൈവിങ് ടെസ്റ്റിന് എത്തുന്ന പാവങ്ങളെ മന:പൂര്‍വം തോല്‍പ്പിച്ച് പണം നഷ്ടപ്പെടുത്തുകയാണ്' എന്നാണ് യുവാവ് ഇമെയിലുടെ ദുബായ് ആര്‍ടിഎ യെ കളിയാക്കിയത്. ഇത്തരത്തില്‍ മെയില്‍ വഴി പ്രചരിച്ച കാര്യം ആര്‍ടിഎയാണ് ദുബായ് പൊലീസിന്റെ ശ്രദ്ധയില്‍ കൊണ്ടുവന്നത്. തുടര്‍ന്നുള്ള അന്വേഷണത്തിലാണ് പ്രതിയെ പിടികൂടിയത്

ഡ്രൈവിങ് ടെസ്റ്റ് പാസാകാന്‍ കഴിയാതിരുന്ന ദേഷ്യത്തിലാണ് താന്‍ ഇത്തരമൊരു സന്ദേശം അയച്ചതെന്ന് യുവാവ് കോടതിയില്‍ പറഞ്ഞു.രേഖകള്‍ പരിശോധിച്ചപ്പോള്‍ യുവാവിന്റെ സ്വകാര്യ ഇമെയില്‍ ഐഡിയില്‍ നിന്നുമാണ് സന്ദേശം അയച്ചതെന്ന് വ്യക്തമായി.മൊബൈല്‍ ഫോണ്‍ ഉപയോഗിച്ചാണ് ഇയാള്‍ മെയില്‍ അയച്ചത്.ഈ ഫോണും ദുബായ് പൊലീസ് കോടതിയില്‍ ഹാജരാക്കി.

സര്‍ക്കാര്‍ വകുപ്പിനെ കളിയാക്കിയതിനും മോശമായി ചിത്രീകരിച്ചതിനുമാണ് ശിക്ഷ. കൂടാതെ സൈബര്‍ കുറ്റകൃത്യവും ഇയാള്‍ക്കെതിരെ ചുമത്തി. നിലവിലുള്ള ഈ വിധിക്കെതിരെ 15 ദിവസത്തിനുള്ളില്‍ ഇയാള്‍ക്ക് അപ്പീല്‍ കോടതിയെ സമീപിക്കാം.