വിവാഹ വാഗ്ദാനം നിരസിച്ച പെണ്‍കുട്ടിയെ യുവാവ് പെട്രോള്‍ ഒഴിച്ച് തീ കൊളുത്തി. ജാര്‍ഖണ്ഡ് ജാര്‍മുണ്ടി സ്വദേശി മാരുതി കുമാരി(19) ആണ് ആക്രമണത്തിന് ഇരയായത്. വ്യാഴാഴ്ച രാത്രി ഭാല്‍കി ഗ്രാമത്തിലെ കുമാരിയുടെ വീട്ടില്‍ അതിക്രമിച്ച് കടന്ന രാജേഷ് റാവത്ത് എന്ന യുവാവ് ഉറങ്ങിക്കിടന്ന പെണ്‍കുട്ടിയുടെ മേല്‍ പെട്രോള്‍ ഒഴിച്ച് തീ കൊളുത്തുകയായിരുന്നു. ദേഹമാസകാലം പൊള്ളലേറ്റ പെണ്‍കുട്ടി റാഞ്ചി രാജേന്ദ്ര മെഡിക്കല്‍ കോളജില്‍ ചികിത്സ തേടി. അക്രമത്തില്‍ പെണ്‍കുട്ടിയുടെ മുത്തശ്ശിക്കും പരിക്കേറ്റിട്ടുണ്ട്.

കഴിഞ്ഞ മൂന്ന് വര്‍ഷത്തിനിടെ റാവത്ത് പല തവണ പെണ്‍കുട്ടിയോട് വിവാഹാഭ്യര്‍ഥന നടത്തിയിരുന്നെങ്കിലും പെണ്‍കുട്ടിയും വീട്ടുകാരും വഴങ്ങിയിരുന്നില്ല. ഇതിനിടെ റാവത്ത് വിവാഹിതനായെങ്കിലും പെണ്‍കുട്ടിയെയും ഭാര്യയായി സ്വീകരിക്കാമെന്ന് ഇവരുടെ വീട്ടിലെത്തി അറിയിച്ചിരുന്നു.

തുടര്‍ച്ചയായി പ്രണയാഭ്യര്‍ഥന നിരസിക്കുന്നതില്‍ കുപിതനായ പ്രതി, ഓഗസ്റ്റ് 26ന് സമീപ ജില്ലയായ ധുംകയിലെ 16 വയസുകാരി അങ്കിതയെ കാമുകന്‍ ഷാറൂഖ് തീ കൊളുത്തി കൊലപ്പെടുത്തിയ സംഭവം ചൂണ്ടിക്കാട്ടി പെണ്‍കുട്ടിയെ ഭീഷണിപ്പെടുത്തിയിരുന്നു. പ്രതിയെ അറസ്റ്റ് ചെയ്തതായും യുവതിക്ക് മികച്ച ചികിത്സ ലഭ്യമാക്കുമെന്നും സര്‍ക്കാര്‍ അറിയിച്ചു.