രാജസ്ഥാനിലെ ഭില്‍വാര ജില്ലയില്‍ പ്രായപൂര്‍ത്തിയാകാത്ത പെണ്‍കുട്ടിയെ കൂട്ടബലാത്സംഗം ചെയ്ത് കൊലപ്പെടുത്തിയ കേസില്‍ പ്രതികള്‍ക്ക് വധശിക്ഷ. 14 വയസുകാരിയെ കൂട്ടബലാത്സംഗം ചെയ്ത കേസില്‍ സഹോദരന്മാരായ രണ്ട് പേര്‍ക്കാണ് രാജസ്ഥാന്‍ കോടതി ശിക്ഷ വിധിച്ചത്. 2023 ഓഗസ്റ്റില്‍ ഗ്രാമത്തില്‍ കന്നുകാലികളെ മേയ്ക്കുന്നതിനിടെ കാണാതായ കുട്ടിയുടെ മൃതദേഹം മണിക്കൂറുകള്‍ക്ക് ശേഷം ഒരു ഇഷ്ടിക ചൂളയില്‍ കണ്ടെത്തുകയായിരുന്നു. പ്രതികളായ കാലു ലാലും സഹോദരന്‍ കന്ഹയും കുട്ടിയെ കൂട്ടബലാത്സംഗം ചെയ്ത ശേഷം തെളിവ് നശിപ്പിക്കാന്‍ ഇഷ്ടിക ചൂളയിലിട്ട് കത്തിക്കുകയായിരുന്നു. ചൂളയില്‍ എറിയുന്നതിന് മുമ്പ് പെണ്‍കുട്ടി ജീവിച്ചിരിപ്പുണ്ടായിരുന്നുവെന്ന് തെളിയിക്കുന്ന ഫോറന്‍സിക് തെളിവുകളാണ് കോടതി ആശ്രയിച്ചത്.

കേസിലെ രണ്ട് പ്രതികള്‍ക്കും പോക്സോ കോടതി വധശിക്ഷ വിധിച്ചതായി സ്പെഷ്യല്‍ പബ്ലിക് പ്രോസിക്യൂട്ടര്‍ മഹാവീര്‍ സിംഗ് കിഷ്നാവത് വാര്‍ത്താ ഏജന്‍സിയായ പിടിഐയോട് സ്ഥിരീകരിച്ചു. മറ്റ് ഏഴ് പ്രതികളെയും കോടതി വെറുതെവിട്ടു. ഇവരെ കുറ്റവിമുക്തനാക്കിയതിനെ ഹൈക്കോടതിയില്‍ ചോദ്യം ചെയ്യുമെന്നും കിഷ്ണാവത് പറഞ്ഞു. ആഗസ്റ്റ് രണ്ടിന് വയലില്‍ ആടിനെ മേയ്ക്കാന്‍ പോയ സമയത്താണ് 14 വയസ്സുകാരിയെ കാണാതായത്. അന്നുരാത്രി തന്നെ പ്രതികള്‍ പെണ്‍കുട്ടിയെ കൂട്ടബലാത്സംഗം ചെയ്ത ശേഷം മൃതദേഹം കത്തിച്ചു. കുട്ടിയുടെ കുടുംബാംഗങ്ങള്‍ തിരച്ചില്‍ നടത്തിവരുന്നതിനിടെ തുറന്ന ചൂളയില്‍ നിന്ന് പെണ്‍കുട്ടിയുടെ ബ്രേസ്ലെറ്റും ചെരിപ്പും കണ്ടെത്തി.

ആഗസ്റ്റ് 4 ന് ഗ്രാമത്തിലെ ഒരു കുളത്തില്‍ നിന്ന് കുട്ടിയുടേതെന്ന് സംശയിക്കുന്ന പാതി കരിഞ്ഞ ശരീരഭാഗങ്ങള്‍ കണ്ടെടുത്തതായി പോലീസ് പറഞ്ഞു. പ്രായപൂര്‍ത്തിയാകാത്ത കുട്ടിയുടെ ശരീരഭാഗങ്ങളില്‍ ചിലത് ചൂളയില്‍ കത്തിച്ചതായും മറ്റ് ഭാഗങ്ങള്‍ എല്ലാ തെളിവുകളും നശിപ്പിക്കാന്‍ അടുത്തുള്ള കുളത്തില്‍ എറിഞ്ഞതായും പൊലീസ് പറഞ്ഞു. സംഭവത്തെ അപൂര്‍വങ്ങളില്‍ അപൂര്‍വമായ കേസെന്ന് വിശേഷിപ്പിച്ച ഭില്‍വാര എസ്പി ആദര്‍ശ് സിദ്ധു, പ്രതികള്‍ക്ക് വധശിക്ഷ ഉറപ്പാക്കാന്‍ എല്ലാ ശ്രമങ്ങളും നടത്തുമെന്ന് പറഞ്ഞിരുന്നു.ആറ് പുരുഷന്മാരും നാല് സ്ത്രീകളും ഉള്‍പ്പെടെ പത്ത് പ്രതികള്‍ കുറ്റകൃത്യത്തില്‍ ഉള്‍പ്പെട്ടിട്ടുണ്ടെന്നും അദ്ദേഹം കൂട്ടിച്ചേര്‍ത്തു.