കര്‍ണാടക മഹര്‍ഷി വാല്‍മീകി പട്ടികവര്‍ഗ വികസന കോര്‍പ്പറേഷന്‍ ലിമിറ്റഡിലെ (കെഎംവിഎസ്ടിഡിസിഎല്‍) കോടികളുടെ അഴിമതിയുമായി ബന്ധപ്പെട്ട് മുന്‍ കോണ്‍ഗ്രസ് മന്ത്രിയും എംഎല്‍എയുമായ ബി നാഗേന്ദ്രയെ ജനപ്രതിനിധികള്‍ക്കായുള്ള പ്രത്യേക കോടതി ആറ് ദിവസത്തേക്ക് എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) കസ്റ്റഡിയില്‍ വിട്ടു. വെള്ളിയാഴ്ചയാണ് ഇഡി നാഗേന്ദ്രയെ അറസ്റ്റ് ചെയ്തത്.

87 കോടിയുടെ ഫണ്ട് ദുര്‍വിനിയോഗത്തില്‍ മുതിര്‍ന്ന ഉദ്യോഗസ്ഥരുടെ സമ്മര്‍ദ്ദത്തെ തുടര്‍ന്ന് മേയ് 26ന് കോര്‍പറേഷന്‍ അക്കൗണ്ട്‌സ് സൂപ്രണ്ടായിരുന്ന പി.ചന്ദ്രശേഖരന്‍ ആത്മഹത്യ ചെയ്തതോടെയാണ് പ്രശ്നങ്ങള്‍ക്ക് തുടക്കമായത്. ആറ് പേജുള്ള ആത്മഹത്യാ കുറിപ്പില്‍ രണ്ട് വകുപ്പ് ഉദ്യോഗസ്ഥര്‍ പണം തിരിമറി നടത്തിയെന്ന് ചന്ദ്രശേഖരന്‍ ആരോപിച്ചു.

നേരത്തെ കര്‍ണാടക പോലീസിന്റെ പ്രത്യേക അന്വേഷണ സംഘവും (എസ്‌ഐടി) കേസുമായി ബന്ധപ്പെട്ട് നാഗേന്ദ്രയെ ചോദ്യം ചെയ്തിരുന്നു. നാഗേന്ദ്രയെ ശനിയാഴ്ച ജഡ്ജി സന്തോഷ് ഗജാനന്‍ മുമ്പാകെ ഹാജരാക്കിയ ശേഷം ഇഡി 14 ദിവസത്തെ കസ്റ്റഡി ആവശ്യപ്പെട്ടു.എന്നിരുന്നാലും, 52 കാരനായ നാഗേന്ദ്ര ആരോഗ്യപ്രശ്‌നങ്ങളുണ്ടെന്ന് അവകാശപ്പെട്ടു. ഇത് ദിവസേനയുള്ള ആരോഗ്യ പരിശോധനയ്ക്ക് നിര്‍ദ്ദേശിക്കാന്‍ ജഡ്ജിയെ പ്രേരിപ്പിച്ചു.

കേസുമായി തനിക്ക് ബന്ധമില്ലെന്ന് നാഗേന്ദ്ര ജഡ്ജിയെ അറിയിച്ചു. ഇത് ഒരു ബോര്‍ഡ് മീറ്റിംഗിലൂടെ നടന്ന പണമിടപാടാണ്, ഞാന്‍ വകുപ്പ് മന്ത്രി മാത്രമായിരുന്നു, അനധികൃത പണമിടപാടുകളെ കുറിച്ച് അറിയില്ലെന്നും അദ്ദേഹം പറഞ്ഞു.പണം കൈമാറ്റം സംബന്ധിച്ച വിവരങ്ങള്‍ ശേഖരിക്കേണ്ടതിന്റെയും ക്രമക്കേടുകള്‍ അന്വേഷിക്കേണ്ടതിന്റെയും ആവശ്യകത പബ്ലിക് പ്രോസിക്യൂട്ടര്‍ ഊന്നിപ്പറഞ്ഞു.
ഇരുഭാഗവും കേട്ട ശേഷം ജഡ്ജി ഗജാനന്‍ നാഗേന്ദ്രയെ ജൂലൈ 18 വരെ ഇഡി കസ്റ്റഡിയില്‍ വിട്ടു.