മോഷ്ടിച്ച പണം ഉപയോഗിച്ച് കുപ്രസിദ്ധ അന്തര്‍സ്സംസ്ഥാന മോഷ്ടാവ് കാമുകിക്ക് സമ്മാനിച്ചത് 3 കോടി രൂപ വില വരുന്ന വീട്. 37 വയസുകാരനായ പ്രതി മൂന്ന് കോടി രൂപ മുടക്കിയാണ് വീട് നിര്‍മിച്ചത്. പഞ്ചാക്ഷരി സ്വാമിയെന്ന ഇയാള്‍ക്ക് ഒരു പ്രമുഖ നടിയുമായി ബന്ധമുണ്ടായിരുന്നതായും പൊലീസ് പറഞ്ഞു. പഞ്ചാക്ഷരി ശങ്കയ്യസ്വാമിയെ കഴിഞ്ഞ ദിവസമാണു ബെംഗളൂരു മഡിവാല പൊലീസ് അറസ്റ്റു ചെയ്തത്. മഹാരാഷ്ട്ര, ഗുജറാത്ത്, തെലങ്കാന, കര്‍ണാടക എന്നിവിടങ്ങളിലായി 150ലേറെ കവര്‍ച്ച, ഭവനഭേദന കേസുകളില്‍ പ്രതിയാണ് ഇയാള്‍.

മഹാരാഷ്ട്രയിലെ സോലാപുര്‍ മംഗല്‍വാര്‍ പേഠ് സ്വദേശിയായ ഇയാള്‍ വിവാഹിതനും ഒരു കുട്ടിയുടെ പിതാവുമാണ്. ദേശീയതലത്തിലെ ടൂര്‍ണമെന്റുകളില്‍ വരെ പങ്കെടുത്തിട്ടുള്ള ബോക്‌സിങ് താരമായിരുന്ന പഞ്ചാക്ഷരി 2009ല്‍ കായികരംഗം ഉപേക്ഷിച്ചാണു മോഷണം തുടങ്ങുന്നത്. ആഡംബര ജീവിതം ലക്ഷ്യമിട്ടായിരുന്നു ഇത്. റെയില്‍വേയില്‍ ഉദ്യോഗസ്ഥനായിരുന്നു പഞ്ചാക്ഷരിയുടെ പിതാവ്. അദ്ദേഹത്തിന്റെ മരണത്തോടെ മാതാവിന് ആ ജോലി ലഭിച്ചു. എന്നാല്‍ ഈ സമയം ലഹരിക്ക് അടിമയായ ഇയാള്‍ കുറ്റകൃത്യങ്ങളിലേക്കു തിരിയുകയായിരുന്നു.

2016ലാണ് പെണ്‍സുഹൃത്തിനായി കൊല്‍ക്കത്തയില്‍ മൂന്നുകോടിയുടെ ആഡംബര വീട് പണിതത്. ഇവരുടെ പിറന്നാളിന് 22 ലക്ഷം രൂപ വിലവരുന്ന അക്വേറിയം സമ്മാനമായി നല്‍കുകയും ചെയ്തു. അതേസമയം, ബെംഗളൂരുവില്‍ അമ്മയുടെ പേരിലുള്ള 400 ചതുരശ്രയടി വീട്ടിലായിരുന്നു പഞ്ചാക്ഷരിയുടെ താമസം. വായ്പ തിരിച്ചടയ്ക്കാത്തതിന് ഈ വീട് ജപ്തി ചെയ്യാന്‍ ബാങ്കില്‍നിന്ന് നോട്ടിസ് അയച്ചിട്ടുണ്ടെന്നും പൊലീസ് പറഞ്ഞു. പിടിയിലാകുമ്പോള്‍ ഇയാളുടെ പക്കല്‍നിന്ന് 181 ഗ്രാം സ്വര്‍ണം, 333 ഗ്രാം വെള്ളി, ആഭരണങ്ങള്‍ ഉരുക്കാന്‍ ഉപയോഗിച്ചിരുന്ന ഫയര്‍ ഗണ്‍ എന്നിവ ലഭിച്ചെന്നും പൊലീസ് കൂട്ടിച്ചേര്‍ത്തു. മോഷ്ടിക്കുന്ന ആഭരണങ്ങള്‍ ഉരുക്കി സ്വര്‍ണക്കട്ടികളാക്കി വില്‍ക്കുകയാണ് പഞ്ചാക്ഷരിയും സംഘവും ചെയ്തിരുന്നത്.