മെഡിക്കല്‍ കോഴയില്‍ ആരോപണ വിധേയനായ മുന്‍ ജഡ്ജിയും ഇടനിലക്കാരും തമ്മിലുള്ള സംഭാഷണമാണ് പ്രമുഖ വെബ്‌സൈറ്റ് പുറത്ത് വിട്ടത്, ഇതോടെ ജഡ്ജി ഹൈക്കോടതിയില്‍ ഹര്‍ജി നല്‍കി, തുടര്‍ന്നാണ് സി.ബി.ഐക്ക് നോട്ടീസ് അയച്ചത്
മെഡിക്കല്‍ കോഴ സംബന്ധിച്ച ഫോണ്‍ രേഖകള്‍ പുറത്തായതിനെ തുര്‍ന്ന് സി.ബി.ഐക്ക് കോടതി നോട്ടീസ് അയച്ചു. ആരോപണ വിധേയനായ മുന്‍ ജഡ്ജിയും ഇടനിലക്കാരും തമ്മിലുള്ള സംഭാഷണമാണ് പ്രമുഖ വെബ്‌സൈറ്റ് പുറത്ത് വിട്ടത്. വരം വേണമെങ്കില്‍ പ്രസാദം നല്‍കണം എന്നാണ് ഫോണ്‍ ശബ്ദരേഖയില്‍ പറയുന്നത്. വെബ് സൈറ്റ് പുറത്ത് വിട്ട ശബ്ദരേഖ മറ്റ് ചില മാധ്യമങ്ങള്‍ സംപ്രേക്ഷണം ചെയ്തിരുന്നു. മുന്‍ ജഡ്ജി ഐ.എം ഖുടൂസി നല്‍കിയ ഹര്‍ജിയിലാണ് ഡല്‍ഹി കോടതി നോട്ടീസയച്ചത്. ലക്‌നൗവിലെ പ്രസാദ് ഇന്‍സ്റ്റിറ്റിയൂട്ട് ഓഫ് എഡ്യൂക്കേഷന്‍ ട്രസ്റ്റിന്റെ മെഡിക്കല്‍ കോളജിന് ഇന്ത്യന്‍ മെഡിക്കല്‍ കൗണ്‍സില്‍ അനുമതി നിഷേധിച്ചിരുന്നു. കോടതിയില്‍ നിന്നും അനുകൂല വിധി സമ്പാദിക്കാന്‍ ഇടനിലക്കാരന്‍ വഴി പണം നല്‍കിയെന്ന് സി.ബി.ഐ കണ്ടെത്തിയിരുന്നു.
കേസ് സുപ്രിംകോടതിയുടെ പരിഗണനയില്‍ വന്നപ്പോള്‍ ഭരണഘടനാ ബെഞ്ചിന് വിടണമെന്ന് ജസ്റ്റിസ് ജെ. ചലമേശ്വര്‍ ഉത്തരവിട്ടിരുന്നു. അതിന് പിന്നാലെ ചീഫ് ജസ്റ്റിസ് ദീപക് മിശ്ര ഏഴംഗ ഭരണഘടനാ ബെഞ്ച് വിളിച്ച് ചേര്‍ത്ത് ഈ ഉത്തരവ് റദ്ദാക്കുകയും കേസ് മറ്റൊരു ബെഞ്ചിന് കൈമാറുകയും ചെയ്തിരുന്നു. അത് വലിയ വിവാദമായിരുന്നു. മെഡിക്കല്‍ കോഴ കേസില്‍ ചീഫ് ജസ്റ്റിസിന് പങ്കുണ്ടെന്ന് കാട്ടി സുപ്രിംകോടതിയിലെ മുതിര്‍ന്ന അഭിഭാഷകനായ പ്രശാന്ത് ഭൂഷണ്‍ രംഗത്തെത്തിയിരുന്നു. ഇത് സംബന്ധിച്ച് ചൊവ്വാഴ്ച അദ്ദേഹം ഹര്‍ജിയും സമര്‍പ്പിച്ചിട്ടുണ്ട്.
ലക്‌നൗവിലെ പ്രസാജ് മെഡിക്കല്‍ ട്രസ്റ്റിനെതിരെയുള്ള കോഴ കേസ് പരിഗണിക്കുന്ന സുപ്രീംകോടതി ജഡ്ജിമാരെ സ്വീധീനിക്കാനും കൈക്കൂലി നല്‍കാനും ഗൂഢാലോചനയും ആസൂത്രണവും നടന്നെന്ന് കേസ് അന്വേഷിച്ച സി.ബി.ഐയുടെ എഫ്.ഐ.ആറില്‍ വ്യക്തമായി പറയുന്നുണ്ടെന്ന് പ്രശാന്ത് ഭൂഷണ്‍ നല്‍കിയ പരാതിയില്‍ പറയുന്നു. മെഡിക്കല്‍ കോഴ കേസ് കേട്ട ബെഞ്ചിന്റെ തലവന്‍ ചീഫ് ജസ്റ്റിസ് ദീപക് മിശ്രയായിരുന്നു. മറ്റ് ബെഞ്ചുകളെ ചുമതലപ്പെടുത്താതെ ചീഫ് ജസ്റ്റിസ് തന്നെ ഈ കേസ് കേട്ടതിനാല്‍ അദ്ദേഹത്തിന് ഇക്കാര്യത്തില്‍ പ്രത്യേക താല്‍പര്യമുണ്ടെന്നാണ് മനസിലാക്കാന്‍ കഴിഞ്ഞതെന്നും പരാതിയില്‍ ആരോപിക്കുന്നു.
ഗൂഢാലോചനയിലും ഇടപെടലിലും ചീഫ് ജസ്റ്റിസ് ദീപക് മിശ്രയ്‌ക്കെതിരെ പ്രഥമദൃഷ്ട്യാ തെളിവില്ലെങ്കിലും വ്യക്തമായ അന്വേഷണം നടത്തണമായിരുന്നു. ജുഡീഷ്യറിയുടെ വിശ്വാസ്യതയെ ചോദ്യം ചെയ്യുന്നതാണ് സി.ബി.ഐയുടെ കണ്ടെത്തല്‍. അതിനാല്‍ എത്രയും വേഗം പ്രശ്‌നത്തില്‍ ഇടപെടണമെന്നും പരാതിയില്‍ ആവശ്യപ്പെടുന്നു. ചീഫ് ജസ്റ്റിസിന് തൊട്ട് താഴെയുള്ള ജഡ്ജിമാരോ അല്ലെങ്കില്‍ സീനിയര്‍ ജഡ്ജിമാരുടെ കൊളിജിയമോ കേസ് പരിഗണിക്കണമെന്നും പ്രശാന്ത് ഭൂഷണ്‍ ഹര്‍ജിയില്‍ ആവശ്യപ്പെട്ടു.
എന്താണ് മെഡിക്കല്‍ കോഴ കേസ്?
ലക്‌നൗവിലെ പ്രസാദ് എഡ്യൂക്കേഷന്‍ ട്രസ്റ്റിന്റെ മെഡിക്കല്‍ കോളജിന് മെഡിക്കല്‍ കൗണ്‍സില്‍ ഓഫ് ഇന്ത്യ അനുമതി നിഷേധിച്ചതിനെ തുടര്‍ന്ന് കോടതിയില്‍ നിന്നും അനുമതി വാങ്ങിത്തരാമെന്നാണ് ഒരു ഇടനിലക്കാരന്‍ ട്രസ്റ്റ് അധികൃതര്‍ക്ക് ഉറപ്പ് നല്‍കി. ഇതോടെ വന്‍തുക ട്രസ്റ്റ് ഇയാള്‍ക്ക് കൈമാറി. ഹൈക്കോടതിയില്‍ നിന്നും സുപ്രീംകോടതിയില്‍ നിന്നും അനുകൂല വിധി സമ്പാദിക്കാന്‍ ഇടനിലക്കാരന്‍ ക്രിമിനല്‍ ഗൂഢാലോചന നടത്തിയെന്ന് സി.ബി.ഐ അന്വേഷണത്തില്‍ വ്യക്തമായി. തുടര്‍ന്ന് മുന്‍ ഒഡീഷ ഹൈക്കോടതി ജഡ്ഡി ഐ.എം ഖുടൂസിയും മറ്റ് നാല് പേരും അറസ്റ്റിലായി. ഖുടൂസിയെ പിന്നീട് ജാമ്യത്തില്‍ വിട്ടു.
https://www.facebook.com/Malayalivartha
