ദാവൂദ് ഇബ്രാഹിമിന് കനത്ത തിരിച്ചടി. അധോലോക നായകൻ ദാവൂദിന്റെ സഹായി ഫാറൂഖ് തക്ലയെ ഇന്ത്യയ്ക്ക് കൈമാറി. ദുബായിൽ നിന്ന് മുംബയിലെത്തിച്ച തക്ലയെ സി.ബി.ഐ ആസ്ഥാനത്ത് ചോദ്യം ചെയ്തുവരികയാണ്.

തക്ലയെ പിന്നീട് ടാഡ കോടതിയിൽ ഹാജരാക്കും. മുംബൈ സ്ഫോടനങ്ങൾക്ക് പിന്നാലെ രാജ്യം വിട്ട തക്ലയെ കണ്ടെത്താൻ 1995ൽ സി.ബി​.ഐ റെഡ് കോർണർ നോട്ടീസ് പുറപ്പെടുവിച്ചിരുന്നു. കൊലപാതകം,​ കൊലപാതക ശ്രമം,​ ഗൂഢാലോചന,​ മന:പൂർവം ആക്രമിച്ച് പരിക്കേൽപിക്കൽ തുടങ്ങിയ കുറ്റങ്ങളാണ് തക്ലയ്ക്കു മേൽ ചുമത്തിയിരിക്കുന്നത്.

ദാവൂദിന്റെ സഹോദരൻ ഇഖ്ബാൽ കാസ്കറെ കഴിഞ്ഞ വർഷം അറസ്റ്റു ചെയ്തിരുന്നു. 1993ൽ രാജ്യത്തെ ഞെട്ടിച്ച സ്ഫോടന പരമ്പരയിൽ 257 പേർ കൊല്ലപ്പെടുകയും 700 പേർക്ക് പരിക്കേൽക്കുകയും ചെയ്തിരുന്നു.